苦練全身肌肉　表達愛的擁抱

苦練全身肌肉　表達愛的擁抱

拖手擁抱乃一對情人必做嘅事，除咗可以行街時候避免走失外，更重要係幫助情感交流。其實拖手擁抱都有其學問，並非隨隨便便拖吓就算，力度要令對方感受到你愛嘅感覺，所以今次就教大家練肌肉兼收緊曲線，讓男孩子抱完你後唔捨得放手。
記者：陳穎欣
攝影：林栢鈞、黃子偉
Makeup：Phyllis&Meegan
Model：AliceTam&Tony@GrandeeModel&Kimi
鳴謝：Algvimia

練手臂攬仔夠冧　

擁抱着重上身力量，由手臂、背肌至胸肌都會運用得到，這樣另一半就能透過你這身體語言明瞭自己嘅重要性，仲即時冧晒！

撐上撐落練臂力

1.將兩臂分開約肩膊距離，撐直放於身後矮櫈上。

2.整個人坐低，手臂彎曲至90°，腰部保持挺直。

次數：每次2組，每組10下。

舉水樽練背肌

1.雙手拿着水樽或啞鈴，分開約肩膊距離並向上直舉。

2.兩手伸直並把水樽放至頭後，然後重複以上動作。

次數：每次2組，每組10下。

十字打開練胸肌

1.兩手持水樽或啞鈴，並向上舉直，手肘向外微彎。

2.雙手打開並放於身體兩旁，直至水平位置。

次數：每次2組，每組12下。

練下盤　夾實似樹熊

有時女仔喜歡好似拍戲一樣，乘男仔不備時，一下跳上擁抱，就像小朋友一般，既熱情又可愛。要當此調皮角色，就要練習埋下身肌肉，咁跳都跳得靈活啲，而且仲可以夾實男友條腰㖭！

扮洗衫板練股肌

1.仰卧，雙腳屈曲，雙手放於身旁，吸氣。

2.呼氣，收緊臀部，將身體直線提升，維持5秒。

次數：每次2組，每組8下。

跣住落唔慌做籮霸

1.背靠牆壁，腰部挺直，雙腳距離牆壁約2個腳板位。

2.慢慢向下蹲，直至雙腳屈曲成90°，維持5秒。

次數：每次2組，每組10下。

抽後腳收PatPat

1.雙手平撐地面，雙腳屈曲跪在地上。

2.右腳提高，在空中向內和外畫3圈。左腳做同樣動作，為1下。

次數：每次2組，每組10下。

收腰S　線條好揸手

攬腰係好多情侶都會做嘅事，要做到全方位都咁好攬，就要收好全身曲線，改善腰肢曲線位就梗係着眼點，咁情人就可以輕抱纖腰，仲點抱都唔怕有膩肉哽手啦。

扭腰無肚腩

1.仰卧，雙腳曲起，雙手置於頭後，吸氣。

2.呼氣，以腹部力量帶動身體上升，然後左手肘碰右膝，右手肘碰左膝，做出轉腰動作。

次數：每次2組，每組20下。

搏命摺腰收全身

1.仰臥，雙手放頭後，雙腳離地，吸氣。

2.呼氣，以腹部力量摺合上身，雙腳縮向頭，提升上身並跟雙腳成90°。

次數：每次2組，每組10下。

扮超人　減得更均勻

1.整個人趴在地上，雙手伸直分開約肩膊距離，吸氣。

2.呼氣，用盡全身力量把整個身體抽離地面，維持超人動作20秒。

次數：每次2組，每組8下。