有謂不招人妒是庸才，但論當今誰最惹火，肯定李家二少澤楷獨領風騷！唔計佢單未解決嘅世紀賣盤交易，就算唔蒲頭，都繼續係talkofthetown！咁呢期大家講佢乜呢？
第一就係佢如果唔再係8號仔主席，仲有冇資格響小圈子特首選舉度做IT界選委；第二8號仔今年提早成個月響11月19日搞運動日，同二少阿爹個「長和同樂日」撞到正，有玩老竇之嫌；第三就係有「消息人士」話，二少好似玩嘢收番8號仔唔賣，單刁係一場遊戲一場夢……實情又係點呢？
先講小圈子選舉，繼上屆響高等教育界別，俾阿教授話連校工都夠資格過佢後，二少轉戰IT界別繼續俾人質疑，尤其佢就快唔再響8號仔做莊，但查實呢個小問題係可以解決。
同老竇硬撼
權威人士話，8號仔下面有唔同單位負責唔同嘅ITSolutions，二少只要做其中一個單位嘅主席，咪名正言順仲係IT界囉，而最有機應該係負責智能身份證嘅企業方案部門！至於話二少有冇貢獻，點都有嘅，當年就係佢親自bid智能身份證呢個冇錢賺嘅project返嚟，幫8號仔省招牌。
正如二少阿爹話齋，冇可能成個香港都鍾意二少，假如二少出戰個界別係叫「富豪第二代」又或者「二世祖」，咁咪一粒反對聲音都冇囉，係咪？
咁個運動日係咪特登撞落「老竇」度呢？權威人士話係生安白做，查實8號仔每年都響10至12月是但揀個日子搞運動會，擇日呢個神聖任務係由「着數」蘇澤光操刀，所以話二少玩老竇，又或者想趕最後一劑以主席身份同員工講再見，其實係幾「薑葱屈李」嘅！唔爭在講埋，權威人士話二少唔打算響11月19號現身，所以今年應該係得「着數」一個撐場，頂盡咪「機緣巧合」加多個誠實小番薯囉！
發少爺脾氣
至於單刁嘛，坊間傳聞二少唔likey，尤其係阿爹硬係要插手，所以𠵱家發少爺脾氣收番個盤唔賣，加埋另一邊廂正在籌備中的誠實小番薯，無厘頭好開心咁同人講「天跌落嚟當被冚」，令傳聞更具真實感，但權威人士話，上述純屬揣測，賣盤工序仍在順利進行……都係嗰句啦，一日未開估一日成街都係風，唔係大家邊有咁多嘢八？