嘩！真係㷫烚烚呀，勁玩大牌檔川菜嘅威哥，竟然首創川式辣椒煮蛇新風味：「年年蛇羮、蛇丸，厭唔厭㗎？食蛇都係想驅寒暖身，加辣，同本意絕對啱Key啫。」講得啱，唔只啱Key，仲好過癮，過癮在蛇肉原來可以同春卷Crossover、老派菜可以變革成錦滷蛇吞、辣子蛇碌仲整到現晒蛇形㖭，去食，小心辣到孖膶腸，做足驚嚇心理準備呀。
記者：朱崇德 攝影：伍慶泉
宮保蛇絲饅頭$60
夥計、二鑊個個笑威哥係佘詩曼Fans，所以諗出呢個菜式；呢個亦係記者成晚食過最辣一道菜：「整宮保，唔辣不如唔好食！」蛇肉嫩炒、肉汁收得緊，用嚟夾饅頭，感覺好東北大漢Feel，包你辣到滿頭大汗。
酸辣蛇羮$20
用川式酸辣湯做蛇羮，前無古人之作！碗面睇見蛇肉切粗絲，食蛇，我都係第一次見咁豪：「自己食過蛇宴，見人哋個蛇羮做到唔知係肉絲定蛇絲，好無癮，所以我特別切粗啲，包保過足癮。」
辣子蛇碌$60
攞上台，嚇親！一嚿嚿蛇碌，蛇形骨紋完全現晒出嚟，威哥話：「蛇最古式食法應該係原碌上，每日新鮮生劏，蛇味濃無得頂。」辣子取其香，唔算太辣，酥炸蛇碌食到卜卜聲，邊位脆到似薯片裏面就鎖死肉汁，賣相恐怖但勁好食。
錦滷蛇吞$38
錦滷雲吞，絕對係經典懷舊菜，呢劑唔用蝦肉，改用蛇肉，由原本Sell鮮味改為Sell濃郁蛇肉香。做到乒乓波咁大，先要將蛇肉打碎到起膠，否則一炸就散，至於蘸食嘅醬汁，用五柳汁加泡椒煮成，甜而不太辣，仲有去油膩功效，食多幾件喇。
蛇肉春卷$38
春卷有節瓜咁大條，「細細條一啖過唔係做唔到，不過放得木耳、甘笋、冬菇等就放唔得多蛇肉，𠵱家食蛇嘛，咪整大碌啲囉。」餡料全部爆香，輕炸卷皮即上碟，勁香口。
水煮蛇片$68
川菜經典做法，入口唔似蛇肉，因為口感仲滑過雞肉，怕食蛇嘅人，絕對係「入門」試食好菜；威哥話香港多人怕辣，所以唔敢太辣，嗜辣者點菜時記得要加辣。
蛇仔煲仔飯$40
威哥嘅煲仔飯一向響朵，一則係生米煮成熟飯，二則豉油醬汁鹹甜適中；睇飯面蛇肉，又係不計成本落重手，滑而不腥肉汁滲入飯香，再加煲仔熱力一逼，香味撲面而來，未食已經口水長流。
孜然蛇肉$60
孜然係川菜裏串燒食品常用香料，主要貪佢夠惹味；今次仲加入大量葱絲一齊炒，又係香氣逼人之作；蛇肉入口香辣味濃，孜然又有香茅般惹味。
辣食川菜響晒朵
聽人講大角嘴有檔川菜勁辣勁得，連夜趁去敲門看個究竟，時為晚上11點，店門好簡陋，老闆兼大廚威哥將店名改做「川味港」，趟門仲自嘲寫多兩個字「草蘆」，門口就泊滿Benz一類名貴房車，感覺真係幾突兀吓。「呢度好多客都係老主顧，由3年前荃灣開大牌檔開始，揸車追食追到嚟大角嘴。」現場食客忙搭嘴：「咪聽老細講啲唔講啲，阿威以前喺嘉湖海逸做大廚，而且仲係川菜專科，酒店師傅手藝大牌檔價錢，當然要揸車三顧草廬啦。」
勝在夠鑊氣
傾談間又有客落單，樓面大嗌：「4個老闆，每人一隻辣蟹，啤酒4支先上。」威哥話呢度啲辣蟹最出名，有時啲客仲自己帶海鮮嚟整「辣餐」，話貪佢正宗川菜風味又夠辣！「不過天口開始涼，又係食蛇季節，所以諗到用川式辣菜煮蛇宴。我諗，香港真係無人咁整過，好多人食蛇又要落檸檬葉，又話要下火，其實秋冬食蛇就係為咗暖身，加辣椒整，食時過癮，食完流一身汗，身暖，又可以去濕氣。」唔講咁多，啪嚿春卷先，唔，入口辣辣哋，蛇肉又暖胃，兩者感覺都幾Match吓。呢度好大鑊氣，間唔中會見到啲客貢入廚房偷師：「啲客最鍾意啲爐火扯到呎幾高，有時我都會當表演示範畀佢哋睇。」梗係啦，咁樣煮菜先至鑊氣夠嘛！煮嘅時間短先至快熟，蛇肉入味嫩而不韌，呢度煮蛇，可以唔規限於整小菜，可能就係呢個原因。
食客有Say
傑佬：「個春卷幾特別，我都幾鍾意食蛇，蛇肉味出奇地咁出。」
Cat：「春卷、錦滷蛇吞又幾別致喎，第二度未食過，味道OK。」
KinKi：「嘩！個蛇碌勁恐怖，用膠水黐番，真係成條蛇走返出嚟。」
搵食資料
川味港（98135761）
地址：大角嘴鐵樹街富多來商場地下44-46號舖
營業時間：6:00pm-2:00am
座位：40個
交通：地鐵奧運站B出口，向新九龍廣場直行10分鐘
人均消費：$30-$60
最好賣：香辣蟹