梁詠琪（GiGi）與鄭伊健甩拖後，近日已覓得法籍新歡Sly，她前晚風騷演出，還穿上紅色旗袍扮中國女鬼，現場大撒溪錢，場面更添詭異。嘉賓林一峰又即場教觀眾講法文，取笑蜜運中的GiGi。
梁詠琪前晚在九龍灣舉行「SmartoneMusicNow欣賞梁詠琪音樂會」，邀請了林一峰擔任表演嘉賓。GiGi穿上紅色旗袍撐傘扮女鬼出場，她獻唱歌曲《等着你回來》和《星語心願》時，舞台上撒下溪錢，增添了絲絲淒美恐怖氣氛。她事後接受訪問說：「因為臨近萬聖節，我咪搞吓氣氛，雖然呢個係自己提議，但灑下溪錢嗰刻，真係好邪同有啲陰森恐怖。」
官恩娜早前在公開活動遭男歌迷強吻，GiGi竟未有吸取教訓，前晚不避忌與男歌迷近距離玩遊戲，她說：「個男fans個樣都好純情，啲fans係我嘅老朋友，我唔擔心。」
林一峰雖抱恙仍堅持到場演出，還即場教觀眾講法文，他用諧音說：「今晚打老虎（法文意譯你好）。」引得哄堂大笑。林一峰又揶揄近日與法籍男友Sly蜜運中的GiGi，他說：「我同GiGi同一個星座，佢𠵱家蜜運中，好快我都有拖拍。」
男友鍾意香港
對於林一峰教觀眾講法文，GiGi說：「我冇留意，得啖笑，當時我換緊衫，我都唔識法文，同佢（指男友）都係用英文溝通。」Sly沒要求來捧場嗎？GiGi說：「佢有問過，我唔畀佢嚟，我唔想大家將焦點放咗喺第二度，大家要留意我嘅工作。」
有報道指Sly近日有意睇樓，可會是為了GiGi而留港發展？她說：「我哋𠵱家仲係了解中，大家文化背景唔同，要慢慢認識，佢留低係因為鍾意香港。」GiGi澄清早前到北京公幹時，Sly並沒同行。
採訪：藍文浩 攝影：仇志德
