上星期六晚睇住舒夫真高同埋波歷克兩位超級球星，終於都一吐烏氣，各入1球下幫車路士以2:1擊敗樸茨茅夫，相信唔少「軍刀」球迷見到佢終於破宿命，入球兼贏波而拍爛手掌。身為領隊既摩連奴梗係開心啦，不過佢賽後就炮轟球證卡頓保黃牌警告「軍刀」就好唔滿意，仲話佢大細超厚此薄彼特登針對佢哋！
其實今次摩連奴扯晒火咁鬧球證卡頓保都唔係無的放矢，如果大家唔善忘既話，應該記得舒夫真高入完波之後衝去觀眾席同球迷慶祝嘅景象似曾相識，無錯！9月尾阿仙奴作客查爾頓場波，尹佩斯入完波又係咁樣慶祝，仲過份到跳埋入去觀眾席㖭，但好衰唔衰，咁啱兩場波嘅執法球證都係卡頓保，但佢就冇一視同仁，淨係黃牌警告「軍刀」，後來亦畀牌入波慶祝嘅波歷克；咁樣嘅雙重標準，梗係俾係人都唔「卸」嘅摩帥重插啦。
陰謀論咁講，之前摩帥成日都話車仔周不時俾人敵視，得唔到公平嘅待遇，呢單野正正就係一個好例子，而且摩帥仲勾番上季卡頓保都試過因為咁嘅慶祝方法將洛賓逐埋出場，今次新、舊賬夾埋計，又真正如摩帥話齋，卡頓保好似特登針對車仔咁，就連我求大俠都覺得摩帥呢次大發雷霆真係有根有據！
「喺我求大俠心目中，幾時都話摩帥心水清，睇佢就連上季嘅舊賬都可以翻到出嚟撐自己，就知佢賽前做咗幾多工夫啦！今次摩帥可以咁理直氣壯鬧人，乜仇都報晒。」