繼改歌詞之後，一眾網友繼續發揮無限創意，今次係改劇本，仲要係將經典的《天龍八部》其中一節改編……厲害！
《天龍八部》之《好淡大戰》──作者：waverlyyip
某日上午……
阿紫：姐夫姐夫，你今日諗住對付嗰班唔聽你話、想做反嘅丐幫淡友呀？
喬峰好友大戶：仲使問？梗係用我聞名天下嘅「降熊十八掌」啦。
阿朱：喬大哥，但嗰班乞丐識「打牛棒法」嘅喎，都係小心為妙好。
喬峰好友大戶：唔使驚，我已經請咗義弟段譽來幫手做假象。
段譽：大哥，你想我點幫你？
喬峰好友大戶：義弟，你一陣就使出你看家本領「凌波微步」，令朝早個市似郁非郁，微進微退，令佢哋失去警戒心，我會喺12:10出招掃上100點，等佢哋死咗都唔知乜事！
段譽：大哥，你好毒。
個市有好戲睇
喬峰好友大戶：無毒不丈夫，股壇盟主個位仲唔係我嘅？哈哈哈哈哈哈！
另一邊廂……
王語嫣：表哥，段譽個二五仔來料，話喬峰就嚟出招。
慕容復淡友大戶：中原「南慕容、北喬峰」，北喬峰果然名不虛傳。嘻嘻，我都唔弱，等佢哋掃上，冇晒啲彈藥，我就出嚟乘漁人之利，點晒佢哋穴，等個市唔郁，再用「斗轉星移」以彼之道，還施彼身，大力掃落，股壇盟主個位仲唔係我嘅？哈哈哈哈哈哈！
王語嫣：好嘢表哥，下午個市有好戲睇！