每星期做直播，見鏡頭喺球賽進行時，攝影師都可以全部捕捉場內場外事件，而導演又好眼明手快咁㩒出街。
一般好似必然主力球星，畀人搶咗個正選位要做後備，鏡頭梗會捕捉佢坐喺後備席嘅慘樣，或者黑口黑面；不過當搶咗佢個位嗰個踢得衰，佢就會陰陰嘴笑，呢啲抵死鏡頭，完全逃唔過導演嘅法眼。
增添睇波樂趣
坐喺貴賓席嘅足球名宿或球會高層，亦都係經常被「獵」嘅對象，球隊有咩緊張場面，影下佢哋嘅反應都係常事。所以攝影隊伍要照顧嘅，並唔只場波咁簡單，場邊睇波觀眾百態都要注意，唔係我哋睇直播邊會咁投入。
近期最搞笑一次係世界盃嗰陣，碧咸一記罰球幫英格蘭贏波，導演醒目地即刻掃上觀眾席衣着性感嘅維多莉亞度，只見佢成個人彈起支持愛郎，我哋成班男主持即刻起哄，仲幫「辣妹」配番幾句纏綿情話，令廠內氣氛即時高漲。如果無呢啲鏡頭，個入球都無咁好睇喇！所以，真係佩服呢班幕後製作班底。
WENDY
由歐國盃EuroBabes，變身球彩台受歡迎主持。