選美出身嘅「索尼」，一向鍾意放生電，近年就專向有婦之夫埋手，但關仁收到風，佢最近連做咗廿四孝老公嘅「治水」都唔放過。話說索尼最近同治水一齊拍劇嘅時候，已經頻頻向對方放電，電到治水暈陀陀，日前佢兩個要拍一場談情戲，劇本明明冇要求佢哋kiss，但索尼同導演講，話加埋kiss鏡頭會更有feel。有靚女送上門，治水梗係舉腳贊成啦，結果佢哋好似慾火焚身咁又攬又錫，睇到工作人員眼都凸埋！
蟻哥埋堆擔正
「肥導演」喺呢行咁多年，同佢有路嘅女星，多到可能連佢自己都數唔晒，但係點解佢咁受女星歡迎呢？事關黐得肥導演嘅，就必定有女主角做，好似呢排肥導演嘅新女，就係前二奶台嘅台柱「蟻哥」，蟻哥跟咗肥導演，仲簽埋畀佢，𠵱家所有肥導演嘅電影，都指定由蟻哥做女主角，難為跟咗肥導演N咁多年嘅「薇姐」，即時要坐歪。
啞鈴獻媚事敗
過氣女星「啞鈴」早排因為識咗「大導演」個副手，所以大導演部戲需要一個妓女角色，咁就搵咗佢去做，雖然個角色係要性感，但唔係場場都要，但啞鈴就真係積極過頭，不但主動勾搭「燥狂影帝」，仲想勾搭埋大導演，有咁性感着到咁性感，但佢又唔知大導演開工時，係幾咁有威嚴同認真，所以眼尾都唔望過佢，搞到啞鈴好冇癮，只好死死氣向番影帝埋首。
Textby關仁