明晚大家扭開電視機，收看無綫播出的第一集《肥田囍事》，會出現一個令人嘩一聲的42吋巨躉──152磅的「肥杏」胡杏兒將如天降大象般落地有聲，重量級爆磅登場。
為了拍攝《肥》劇，杏兒在5個月內化身由瘦變肥再翻瘦的橡筋人，本來纖瘦的她養「豬」處優，成功強谷近40磅脂肪，過程實在血淚成籮。
杏兒對增肥無悔，在她的人生中，創下轟烈壯舉，更在無綫電視史上記下傳奇的一頁。撰文：朱倬誼
首部曲：聞增肥嚇親
胡杏兒：「瘦嘅時候成日嫌自己肥，可能面形啦，覺得上鏡肥咗啲。知道要增肥時，幾突然，冇諗過。公司畀乜嘢角色我做，儍嘅、癲嘅都可以參考同模仿，但知道增肥就打個突，心諗：『唔係吖嘛？咁樣玩我？』好多記者問我，點解我唔推？一來未有呢個資格，二來都冇可能推，公司都覺得係好機會，作為一個演員，有呢啲機會嘗試係幾難得。」
擔心健康
「喺我呢20幾年嚟，未曾超過118磅，燒嘢食可以放縱咁食，知道增肥後真係𢱑晒頭，好多問題喺我腦海閃過，肥唔到又點樣呢？當然都擔心健康，我一路食嘢咁清，𠵱家要將所有嘢反轉晒。好努力增肥，啲人會唔會接受呢？第日會唔會瘦得番呢？」
「但我嘅性格幾鍾意挑戰，當然要喺健康狀況好嘅情況下，唔會攞命嚟博。撇除套劇將來嘅反應好唔好，一個人有付出努力，收成會愈好，我攞住呢個宗旨去做。可能大家會知道，有啲扮肥妹嘅劇，會化妝、裝假肚，但我諗若我又係咁做嘅話，意義又喺邊呢？真係要做得好，就唔可以用假，一定希望真身增肥去拍套劇，但夠唔夠時間增肥呢？雖然時間唔多，得個半月，都要goahead。」
二部曲：墮入黑暗期
「4月22號《太極》煞科後，第一日開始增肥革命，初初覺得好正，任食。嗰時開始放假，食嘢食到飽，瞓晏覺，養『豬』處優，食雪糕、朱古力、薯片、炸嘢，但去到某一個階段，要飲健身奶粉，係難飲到嘔，第一次飲嘅感覺係：『我喺度做乜呀？我為乜呀？』一杯12安士嘅杰撻撻粉紅色異形物體，第一個禮拜都OK，達到目標磅數後，無形壓力會令自己唔想食嘢，以前瘦嘅時候仲食得多過增肥，其實係一個黑暗期，見到嘢成日唔想食，食唔晒又有內疚感，係好有壓力咁迫自己食嘢。」
怕變遺作
「但我一定要做到！我一路都話要做到嘅嘢就一定要做到，冇理由衰喺自己手度，好在我識得開解自己，後尾覺得唔好諗咁多，心情唔好就一定肥唔到，盡量令自己開心，想食就食，唔想食就唔好食。」
「我終於慢慢走出黑暗期，走向光明，去到131磅時，有個平台位，當時距離第一次《肥田》記者會嘅deadline仲有一個月，營養師介紹我食另外一隻呍呢拿味嘅奶粉，呢隻奶好神奇，多得佢，我跟住一路體重飆升，當然都有食嘢。我唔想靠藥物，始終食藥係違反自然定律，套劇又唔係我最後一套，變咗遺作咪死？拍完後仲要瘦番，有好多嘢要面對，一步一驚心。」
「6月2日見記者，我143磅，條腰34吋！嗰日至知自己嘅體重真係好勁，努力個幾月，都係想人話我肥啫，冇嘩一聲就失敗咯，好彩啦！之後我最肥去到152磅。」
三部曲：減肥拒激瘦
「8月《肥田》煞科，嗰日拍完，知道要告別肥妹，真係想喊㗎，覺得好唔捨得，辛辛苦苦堆砌咗呢個肥田，感覺好似自己喺意大利拍《向世界出發》時，見到啲藝術家喺地上畫畫，夜晚要用水抹番咁。」
「𠵱家心態同以前有啲唔同，以前成日話要好瘦好瘦，瘦到好骨感，面又凹晒，反而唔係咁靚，我都會減番瘦，但唔會過瘦，唔係激瘦至靚，有時激瘦個樣會唔精神，卡通公仔都係圓咕碌，唔會起角，𠵱家有纖體公司幫，佢哋都唔會贊成好瘦好瘦，身形靚就得啦。」
心態改變
「我喺心態上都有改變，努力做嘢，人哋一定會睇到，唔好一開始就諗得定唔得，如果開心去做一件事會容易啲，目標會易啲達到。我幾幸運啦，雖然喺呢件事（拍劇增肥）上，比人哋付出多咗，我覺得好值得，唔止事業上有得着，喺人生上都係，老咗lookback，做咗一件轟轟烈烈嘅事。」
後記：盼砌低阿佘
肥，成了胡杏兒的出位武器，肥杏的確cutie，問她有沒有信心撼低無綫台慶最佳女主角獎的大熱佘詩曼，杏兒說：「阿佘係我勁敵之一，今年勁敵都有好多，有蔡少芬、鄧萃雯，我會當有獎係bonus。攞女主角獎一定係我目標之一，相信每一個花旦，都會視呢樣為目標嘅。」
