從來小孩同寵物都係最難控制！前晚Venture影樓喺中環開幕，呂良偉太太楊小娟帶咗4歲囝囝Ryan到場，同場遇上周美鳳嘅兩隻狗仔，Ryan即時扭計話要抱，穿低胸背心嘅楊小娟要踎低𠱁囝囝，話遲啲再買，點知Ryan即時大叫：「你呃我嘅！」搞到阿媽好尷尬，惟有話：「平時佢唔係咁曳，可能佢真係好鍾意狗仔。我喺屋企都係做晒衰人，扮惡嗰個，阿呂就做好人。」