呢排各間大學輪流舉行開放日，畀正諗緊聯招報乜課程嘅預科生參觀，噚日輪到港大同嶺大。港大年年都好認真搞，校長徐立之噚日朝早親自率領一支由港大師生組成嘅50人鼓樂團，喺開幕禮上一齊擊鼓演奏，有板有眼，絕非求其耍兩招；港大一眾高層包括副校長、各院長同教務長都有出席，顯示學校上下一心。
下晝仲有各宿舍宿生一齊叫口號比賽，內容絕冇不文，由徐校長做評判，結果又係由大學堂冧莊攞第一。港大又向來賓Showoff，話今年收到全港八成會考尖子和九成高考狀元，20個報讀法律課程嘅尖子都入晒港大，咁講即係明向剛開咗法律學院嘅中大「挑釁」。
嶺大方面雖然冇咁多活動，但校長陳坤耀都有出嚟，實行做人肉布景板，同啲參觀者影相傾偈，而呢年係佢離任之前最後一次開放日。中小學校長教師面對學生人數減少，出嚟宣傳吓學校都話有辱教師尊嚴，佢哋真係要學吓兩位大學校長囉。