因為荷李活翻拍又掀起熱潮嘅港產片《無間道》，大家仲記唔記得陳慧琳喺戲入面飾演嘅心理專家？現實版之中，亦有一位為無數警務人員提供過輔導嘅心理專家，但唔係大美人，佢係傳媒之友、專業註冊臨床心理學家羅志華博士。
羅博士早排到南京參加咗一個兩岸四地刑事心理研討會，返嚟之後感慨良多。事關中國、澳門同台灣都派警隊代表出席，但香港只係搵懲教署做代表，反而更需要心理輔導嘅香港警察，人影都冇。
羅博士話，𠵱家平均每星期睇十幾個紀律部隊人員求助個案，好多係因為自殺或離婚，警隊係重災區之一，有行beat嘅PC仔，亦有高級嘅管理層。佢批評警方忽視前線警員嘅心理狀況，只係識一味教佢哋要自信爆棚，缺乏策略性訓練，搞到個個壓力鬼咁大，好多人嘅個人理財同家庭問題亂七八糟，而警隊提供嘅心理輔導又流於表面，令成班伙記唔識宣洩情緒，結果出咗一個又一個魔警。
反觀中國同台灣，當地嘅警員犯罪率雖然比香港嚴重，但人哋對症下藥，放足夠資源為班伙記搞心理輔導，呢方面香港警方真係要好好檢討吓。