由瘦變肥，胡杏兒遇過很多難忘的事。肥的時候，她贏了人氣和觀眾緣，但心態、體形、日常生活的突變，卻意想不到，古靈精怪無奇不有，但總括而言，「肥杏」仍是讓她留下快樂回憶。
周身肉
「當時我150磅，都唔覺好肥，因為係慢慢咁，着開嘅衫扣唔到鈕，褲『休』到上大髀上唔到，踎低時腳瓜瓤好多肉夾住，大髀之間條罅冇咗。」
惹注目
「肥嘅時候好易攰，對腳承受嘅壓力重咗，成日都搵櫈坐。又多咗人望我，望完個樣就向下望，自己又多咗掹衫嘅習慣，成日驚個肥腩凸咗出嚟。」
難買衫
「我以前冇肥腩，真係得天獨厚，好多嘢唔識珍惜。做咗肥人後，我去買衫，真係一件都買唔到，唔知好嬲定好笑。死啦，肥咗借衫好大問題，啲人話：『吓，唔知有冇佢size喎』、『都係冇㗎啦』。」
大髀痛
「我試過行條樓梯，以前兩步就行咗上去，肥咗係行到大髀肌肉痛，行唔到，又唔敢周圍坐，驚坐爛櫈，會搵張相熟嘅櫈至夠膽坐。」
踩爆踭
「拍《肥田》時試過踩爆踭，有場戲搶花球，我仲懶醒咁帶對斗零踭，拍少少跑戲時，成個鞋踭爆咗，對鞋仲係我家姐㖭。」
增Fans
「試過有肥仔fans嚟探班，又試過收到幾特別嘅信，有封係個男仔寫嘅，佢想增肥，好想我介紹醫生畀佢；又有一封係英文信，係一個住喺香港嘅美國人，佢有個中國太太，佢話有留意到我增肥，覺得我肥咗好好，千祈唔好減肥，最緊要係自己開心，我都幾感動。」