「白癡」同「大風遮」結咗婚，佢嘅一號過氣情人「西西」拖新女示眾，二號過氣情人「小秋」就成日扮妒忌，仲語出驚人寸白癡，其實全部只不過係小秋嘅掩眼法，好耐之前佢自爆有心儀對象，又話唔敢追人，又話冇下文，事實佢份人邊有咁純情，呢個圈外女友佢一早追到手，仲經常好恩愛咁拍住拖四圍食飯，最鍾意去中環著名牛腩麵舖，狗仔隊得閒嘅話，不妨去等下佢，或者有收穫。
飄零狂拋英語
選美皇后「飄零」當年一卸任就嫁入豪門做大少奶，可惜婚姻一啲都唔美滿，佢之前已經公開話唔用夫姓，近日飄零透過友人承認前年已經離咗婚，佢自從放下大少奶呢個包袱，真係輕鬆咗好多，不時飛返內地會情郎。關仁搭飛機都撞過佢幾次，飄零份人成日粒聲唔出好似好低調，但其實好鬼扮嘢。有一次空姐好有禮貌用廣東話問飄零想食乜，點知佢賴巴閉咁用英文答，其實佢識廣東話啫，使乜晒英文，唔通佢近朱者赤，受鬼婆老友影響？
竹升仔冇錢照蒲
有勾義嫂前科嘅「alone」成員「竹升仔」，工作量甚少，平日拍戲都係做散仔居多，雖然有個明星阿媽撐腰，但長貧難顧。雖然竹升仔周身冇蚊，但都可以日日去蒲兼媾女喎，皆因佢冇錢就做菠蘿雞，四圍黐飲黐食。個零禮拜前，關仁落蘭桂坊Volar時，就撞正竹升仔同一男一女友人喺度蒲，當時睇住個侍應捧三杯cocktail行埋佢哋身邊，侍應企正喺竹升仔隔籬，等佢埋單，點知佢竟然扮睇唔到，仲擰歪面同其他人傾偈，結果要由同行嘅女性朋友埋單。堂堂大男人，冇錢咪唔好蒲囉，蒲得咁寒酸，真係樣衰！
Textby關仁