何韻詩一連三場嘅處女紅館個唱，將會喺星期四（26號）開鑼，佢前晚同班舞蹈員喺尖沙嘴排舞，即席表演兩個高難動作。首先係一位男舞蹈員扶住佢條腰，然後成個人360度轉圈，跟住一班男舞蹈員排成一列，阿詩成個向後瞓低，男舞蹈員接住佢，再幫佢一個鯉魚反身後空翻咁落番地，兩個動作都唔係咁易㗎。
排舞瘦十磅
阿詩呢期排舞瘦咗十磅，連胸都冇埋，啲設計師幫佢做咗啲高領舞衣，阿詩主動叫人開低少少，問佢係咪見蔡依林G奶出場，佢要以A奶還擊？佢話：「我咁樣都冇嘢睇啦，fans聽我唱歌唔係睇呢啲㗎，不過我練到腹部有條坑，好多肌肉。到時出場會係好危險同賣命，我會冇威吔冇安全措施，企喺一米乘一米嘅嘢度，再升高三層樓，個台𠵱家超支幾十萬，會喺歌酬度扣。」