台灣藝人張震嶽舊年同拍拖7年嘅舊愛路嘉怡分手後，佢嘅感情生活愈來愈精采，今年8月，阿嶽嘅21歲大學女生好友陳芸凡自殺輕生，有指因為佢冇當個女仔係女朋友，所以令陳芸凡傷心欲絕自尋短見，阿嶽自女方輕生後，心情好差，仲變得好悲觀。
愈挨愈埋
經過兩個多月後，阿嶽嘅心情開始好轉，原來佢已另結新歡，上個禮拜二仲喺台灣同新女伴以及兩名男性友人一齊去睇戲。
當晚大概8點，四個人喺戲院出現，阿嶽新歡着上便服戴鴨舌帽，個樣幾清純，其間佢同阿嶽傾得零舍投契，佢哋並肩而行，攰咗就齊齊喺附近嘅長櫈坐低，阿嶽之後就拎咗部手機出嚟同女伴大玩自拍，然後又一齊玩手機，佢哋嘅頭愈挨愈埋，好似黐頭芒一樣，當同行兩男友人透明。
對於阿嶽有新戀情，佢透過經理人黃靜波話當日同行嘅女伴叫小鳳，係阿嶽本色製作公司嘅職員，由於兩人都有原住民血統，所以一同負責推廣原住民文化工作，已經識咗10幾年，感情好好。問到有冇可能發展成情侶？黃靜波斬釘截鐵代阿嶽話：「不可能成為情人，兩人反倒像是姊弟。」
採訪、攝影：黎寶蘋
