政府宣布畀32億資助貨運業換走啲老爺車，減少空氣污染，但係啲貨車大佬反應冷淡。鬼咩！係人都知班司機全部都喺大陸入平油，換乜嘢車都嘥氣。環境運輸及工務局長廖秀冬（圖）噚日喺香港電台節目《綠識朋友》仲搬出自由經濟嚟遮醜，話要保障個人財產，唔可以定一個車齡上限淘汰晒啲黑煙車，又口口聲聲話財政誘因喺的士換石油氣車上好成功。唔知點解佢忽然失憶，唔提用錢引小巴換車徹底失敗。政府唔敢得罪運輸業，對大財團就更加無能為力，冬冬又話啲巴士公司要換老爺巴士每架要成300萬，唔可以話換就換，要錫住巴士公司荷包。睇嚟為咗巴士公司暴利着想，小市民只好繼續一路行街，一路食塵。