資本策略（497）對上星期四有上千萬股上板活動，基金圍重飛，資策要昅實。資策雖則係蚊型股，細細粒，但基金陣容鼎盛，名牌包括Stark、雷曼兄弟、JPMorgan及PMA，全部都係資策股東，就連策略性投資者，好似小小超及德祥（372），粒粒皆星。
仲要咁睇，資策經商界高人鍾楚義入局，短短兩年間，獲名牌基金投資，兼且連同雷曼兄弟齊齊搞地產項目，以鍾氏本身背景及人際網絡關係，肯定有得發圍。再講，資策頻頻集資，手頭現金應該上10億銀，銀彈充裕之同時，又無話亂買嘢，呢一點，對管理層又多個肯定。資策今年初曾高見1.8元，到家陣已由高位調整25%，現價（1.34元）相對NAV2.07元折讓35%。作為收租股，資策折讓似乎大咗啲，開始收集，博佢上返1.8元，潛在回報率34%。
即炒冠中博賺1成
冠中地產（193）最近球來球往，對上星期五，就承咗11球貨，成交先行，昅昅。冠中最新NAV0.26元，現價（0.137元）相對折讓47%，係有NAV墊底嘅濠賭股，而呢期所見，資金開始換馬炒細價股，濠賭係一已經成形嘅topic，只要同類股一郁，冠中可炒同氣連枝。又集團手頭淨現金近兩億銀，財政無問題，就當短打，可以放心。呢轉即炒，唔貪心，博佢一成升幅，應該無難度。
錢雋