官恩娜追捧偶像
「我好鍾意黃日華，基本上佢每套劇我都會追，不過咁多套當中，我最鍾意係《馬場大亨》，佢做李大有呢個角色真係好到冇得頂。李大有嗰種衝動嘅性格又真係好難頂，佢決定咗要做嘅事，一定冇人阻到佢。」
最喜歡劇集：《馬場大亨》
最喜歡角色：黃日華（李大有）
鄭融着緊慳妹
「呢輪收費電視台重播《大時代》，我都有追嚟睇呀！劇情好緊張，尤其係劉青雲嘅角色，覺得劇入面嘅佢好勁呀。不過最喜歡嘅角色就係周慧敏嘅慳妹，可能因為佢嘅性格令人覺得好舒服，同劇入面其他角色分別好大，而且佢雖然經歷好多嘢，好慘，但最終都冇事。」
最喜歡劇集：《大時代》
最喜歡角色：周慧敏（慳妹）
蘇玉華到肉好笑
「其實同一個系列嘅《女人唔易做》我都想揀，不過一定要揀一套就揀番自己有份做嘅《男人之苦》啦，套劇講夫妻間嘅矛盾，真係好到肉，我同松哥（劉松仁）喺劇中飾演夫妻，其中描述我哋夫妻之間嘅親熱場面，好巧妙咁以卡通化同喜劇化去處理，睇番都會笑出嚟。」
最喜歡劇集：《男人之苦》
最喜歡角色：劉松仁（康天任）
向海嵐感同身受
「我鍾意《女人唔易做》，雖然唔係睇晒咁多集，不過有聽番身邊嘅朋友嘅評語，都覺得套劇好寫實。𠵱家社會上真係有好多事業有成，但感情都有着落嘅女性，令到好多女性觀眾都有共鳴，謝天華同鄧萃雯又將個角色演繹得好好，令人印象深刻。」
最喜歡劇集：《女人唔易做》
最喜歡角色：謝天華（賤Man）
高鈞賢愛上古仔
「嗰時喺加拿大住，啲Auntie成日租劇集錄影帶，當時呢套《創世紀》簡直令我瘋狂，最難得係成百集嘅長劇都咁緊湊，完全冇悶場，套劇真係好能夠代表香港，睇完覺得古天樂好型，連食香口膠都食得有型過人，一直到𠵱家都咁鍾意佢。」
最喜歡劇集：《創世紀》
最喜歡角色：古天樂（張自力）
郭藹明偏袒老公
「哈哈，鍾意呢套劇梗係因為方展博（丈夫劉青雲的角色）啦，講笑啫。我鍾意呢套劇，係因為整體都好好，好似劇本都好突出，角色性格又鮮明。如果揀一個最鍾意嘅角色，我會揀丁蟹，佢個角色好特別，當時真係覺得幾震撼，𠵱家好多戲都係用咗佢嘅嘢。」
最喜歡劇集：《大時代》
最喜歡角色：鄭少秋（丁蟹）
關楚耀選角適當
「我好鍾意睇《男親女愛》，鄭裕玲（嘟嘟）加上黃子華已經係一個好強嘅陣容，就連其他做小角色嘅演員都做得好好。嘟嘟姐做律師MissMo簡直係入型入格，講嘢又夠mean，而且佢一身嘅打扮真係好似一個專業律師。」
最喜歡劇集：《男親女愛》
最喜歡角色：鄭裕玲（MissMo）
余文樂水槍扮警
「我最鍾意睇《新紮師兄》，我阿媽話畀我知當時我只得3、4歲，一聽到《新紮師兄》嘅開場音樂，我就會唔喊，之後立即扮警察敬禮。我當然最鍾意係梁朝偉個角色（張偉杰）啦，佢真係好型，睇完之後我都成日孭住枝水槍扮警察，而且有諗過大個之後要當差。」
最喜歡劇集：《新紮師兄》
最喜歡角色：梁朝偉（杰佬）
採訪：王連連、李珮洳、卓美娟
