《變種特攻》（X-Men）嘅狼人曉治積曼（HughJackman）同《蝙蝠俠：俠影之謎》（BatmanBegins）嘅新蝙蝠俠基斯頓比爾（ChristianBale）呢兩位猛男，喺《俠影之謎》導演基斯杜化路蘭（ChristopherNolan）奇幻嘅影像安排下，由家喻戶曉嘅英雄人物，變身成《死亡魔法》（ThePrestige）嘅敵對魔術師，鬥個你死我活，引發出一個奇幻莫測嘅驚殺故事。唔少影迷已相信呢套片會係繼《凶心人》（Memento）同《俠影之謎》後，另一套基斯杜化路蘭嘅招牌傑作。 撰文：戶川惇
邊個話女人小器過男人？其實男人小器起上嚟仲犀利，明刀明槍絕無隱藏，狠毒到想盡辦法置對方於死地。本周四（26日）正式喺本地上映嘅《死亡魔法》入面，曉治積曼同基斯頓比爾，本來係兩個惺惺相惜嘅魔術師好友，點知因一次合作失敗即時反晒面，從此當對方係無可寬恕嘅敵人，彼此誓要設計出更厲害、更危險嘅魔術表演同對方鬥過，甚至連身邊嘅人都冇好死，仇恨嘅力量真係可怕。
配角有料到
套片有兩位型男擔大旗外，仲有美艷女星施嘉莉祖安遜（ScarlettJohansson）飾演曉治嘅助手，佢以一貫性感銷魂形象現身，紓緩影片嘅緊張黑暗氣氛。連好戲嘅米高堅（MichaelCaine）同近年好少拍片嘅大衞寶兒（DavidBowie），都分別做魔術界前輩同大科學家，令電影生色不少。
影評讚唔停
講真，對影迷而言，最期待都係導演基斯杜化路蘭同佢個編劇細佬尊立頓路蘭（JonathanNolan），繼令人回味無窮嘅《凶心人》之後再度合作。睇過套片嘅外國影評同影迷都讚不絕口，識貨嘅影迷自然乖乖買飛排定隊捧場，如果你唔鍾意啲有創意、破格同智慧嘅電影，都係勸你同啲姨媽姑姐去睇《寶貝計劃》好喇。