眾人媽打、前民政事務局常任秘書長李麗娟辦喜事，佢位千金劉盈Cynthia噚日同拍拖６年嘅男友James結婚，榮升外母嘅媽打飲喜酒時，個仔Christopher代佢話阿媽最想快啲抱孫。
喺加拿大出生嘅台灣女婿James，今年32歲，從事貿易工作。一對新人早上行禮，地點唔喺大教堂或者靚酒店，而係揀咗仲起緊、位於薄扶林嘅香港演藝學院第二校舍，仲布置成教堂咁，低調得嚟好有創意。Cynthia無着婚紗，着套紅噹噹嘅中式裙褂，新郎就中式唐裝去接新娘，夜晚一對新人換番西式禮服同晚裝；反而媽打同前夫就中式褂裙同長衫打扮。媽打下午兩點幾就坐古董勞斯萊斯到場，笑到見牙唔見眼。前律政司司長梁愛詩負責主禮，唔知係咪記錯時間，早咗一個鐘頭到，惟有出去兜陣風再返嚟。
陳四萬遊英冇去飲
一對新人夜晚係洲際酒店擺喜宴，早到一批有范徐麗泰，佢6點半就到，唔肯透露送咗啲乜畀女家，只係希望新娘啱用，佢逗留半個鐘頭後就走，原來趕住去太古城出席一個藥膳嘅開幕典禮，咁忙都到場，都算有心。早到早走嘅仲有賭王何鴻燊，嚟咗20分鐘就由四太扶住落樓梯離開；特首夫人曾鮑笑薇，在場逗留15分鐘。媽打手帕之交之一嘅王䓪鳴好識do，親送曾太離開。
另一個好識做嘅係林貝聿嘉，佢上嚟禮堂無耐後走番落嚟，原來係去接董趙洪娉同梁愛詩，組成三人行。其間董太嚟料，行行吓突然對投射喺地磚嘅Mr&MrsTsao字樣好有興趣，仲索性企喺度睇，搞到林太同梁愛詩要同佢一齊企。
噚晚飲喜酒嘅嘉賓唔少係高官，計有何志平、孫明揚、俞宗怡、羅范椒芬、林鄭月娥、李淑儀等，前高官就有梁錦松同楊永強、林煥光；仲有鍾士元、鍾逸傑、梁智鴻、李鵬飛、劉千石、高永文、何大一、陳南祿同鄺其志等。汪明荃就過咗８點至到，佢話同新娘唔熟，但係同媽打好熟，又話自己送禮券，有記者問佢幾多位數字㗎？佢就嬲爆爆咁回答：儍嘅，唔會講咁話。要提一提嘅係前排新聞人物陳四萬就冇到，因為佢上個禮拜初已經去咗英國旅行，睇怕係趕唔切番嚟。
