立會議員郭家麒噚日公開自己身體狀況，話自己係中風嘅高危一族！不過佢唔煙唔酒，又冇高血壓同高膽固醇，更加點都唔算肥，如果佢都係高危，係咪好多肥局長同肥議員都應該高危過佢先？
噚日佢出席世界中風日嘅活動時，好欷歔咁話，睇番自己家族病歷，已經有四個人中風，包括阿爺、阿嫲同兩個姑媽。佢話：「我細個時阿爺已經因為中風郁唔到，有時我曳見佢想打我都打唔到，都覺得幾慘。」
為咗防止悲劇重演，郭家麒已經特別小心，除咗定期量血壓，又盡量每日抽時間做30分鐘運動，最緊要就係唔好食煙！所以臨尾佢都忍唔住講句，香港就快實施室內同公園禁煙，真係值得開心。