城大副校長唐叔賢俾《壹週刊》話佢疑包養「北姑」嘅新聞已曝光個多星期，其間一直喺外地參加學術活動嘅城大校長張信剛返香港之後，噚日首次評論事件。佢話：「文章對城大及唐副校長名譽造成負面嘅影響，對此感到好遺憾。」
張信剛話，唐叔賢已經否認醜聞，校董會主席鍾瑞明（圖）就表示好關注事件，噚日校董會開會聽取師生代表意見，決定會進一步了解事件。不過，張信剛冇講自己點睇，無論記者點追問，佢都係講呢幾句。聽講佢剛剛去完中東國家，唔知會唔會受到當地容許回教徒男人可娶四個老婆嘅文化影響？
雖然唐叔賢唔認包北姑，但事發至今佢自己從未出嚟親口講過嘢。俾人影到佢同一位年輕性感女子拖手行街，但竟然話冇嘢，真係好難令人信服。