九鐵兵變已經係歷史。事件主角田二少當日慘勝之後，比之前低調好多。有人就估政府肯定會郁佢，而田二少對九鐵主席一職都已經意興闌珊，今年底任期屆滿就會「退位」。但係政府噚日宣布，行政長官曾蔭權再度委任田北辰做九鐵主席，任期去到出年7月31日，即係仲有九個月多啲。
政府又再度委任九鐵管理局現任非官方成員，羅榮生、吳亮星、包立德、石禮謙、溫文儀、王于漸等六位繼續留低，任期都係到出年7月31日。其實原因好簡單，兩鐵合併已經去到只差臨門一腳嘅地步，政府派入九鐵嘅行政總裁詹伯樂又已經控制晒大局，𠵱家當然以不變應萬變至係上策，以免合併節外生枝。