台灣第32屆曾虛白新聞獎噚日頒獎，台灣《蘋果日報》囊獲「報紙評論獎」及「報紙攝影獎」兩項大獎，係所有參賽媒體嘅最大贏家，恭喜晒！
《台蘋》顧問江春男嘅評論專欄「司馬觀點」獲報紙評論獎，曾經做過總統府國家安全會議副秘書長嘅江春男領獎後致辭話，從細到大呢次係第一次得獎，佢算係「老年得獎」，比起「老年得子」更興奮。
江春男又分享寫評論嘅經驗，佢引述其他人話「坐在打字機前，心中沒有朋友」，但知易行難，因為心中即使冇朋友，都會有偏見。呢位報業老前輩話，呢幾十年寫評論，已經將朋友得罪晒，所以記者係好寂寞嘅職業，「最好的朋友也只記得你罵他的那句話」。佢帶住感慨咁講：「因為寂寞，所以需要新聞獎的鼓勵」。
另一位獲獎嘅《台蘋》攝影記者塗豐駿，以拍攝台北市民宅瓦斯氣爆嘅現場照片得獎，更被評審認為係「富有人道素養」嘅攝影作品，塗豐駿當場宣布將十萬蚊台幣獎金，捐畀當日救難受傷嘅五名消防隊員，真係值得敬佩。