上月喪父的劉嘉玲，前晚終出席公開場合，與Versace設計總監晚宴。瘦了10磅的她容顏仍覺憔悴，她直認仍未走出喪父傷痛，更深明卓韻芝的心情，但從未有想過自殺，又否認已與梁朝偉結婚。
劉嘉玲上月喪父後，一直飽受傷痛，深居簡出，連自己投資的上海酒吧開幕都缺席，她前晚終重過新生活，悉心打扮到中環與Versace設計總監DonatellaVersace食晚飯。
想繼續休息
嘉玲穿上開胸晚裝裙，暴瘦得連豐滿上圍也消失得無影無蹤，她直認消瘦10磅，她說：「心情仲未平復㗎，今晚唔係嚟散心，係好耐之前答應咗嘅工作，其實我都仲想休息吓，同埋我盡量抽時間陪吓媽咪。有心，多謝你哋關心。」
記者讚嘉玲堅強面對死亡，她說：「每個人都有呢啲經歷，係要習慣同接受，有人快啲，有人慢啲。發生喺我身上，我都係恢復當中，我覺得自己都長大咗。」
商台DJ芝See菇Bi（卓韻芝）日前被指因與男友鬧翻及思念亡母而服安眠藥自殺，嘉玲說：「我有睇新聞，我明白佢嘅心情。生命係好脆弱，更加要愛惜自己和健康。」喪父後有沒有想過做儍事？她堅决說：「冇。」劉父喪禮上，梁朝偉以「父親大人」作上款送花牌，即時傳出兩人已婚消息，嘉玲否認說：「冇，唔關事，我老竇嘅離開同呢件事無關，我同偉仔一齊成20年，呢個（稱呼）係偉仔對我爹哋嘅尊重，係好正常，唔使大驚小怪。」
踩偉仔廣告
言下之意，可否叫嘉玲做「梁太」？劉嘉玲笑一笑說：「我都係習慣叫劉小姐多啲。」不過她又不忘多謝男友照顧，而對梁朝偉澳門星際酒店新廣告惹來劣評，她說：「我都覺得唔係幾好，可能係印刷上出問題。」
此外，商台DJ森美前晚去藝術中心捧Zarahn場，他表示卓韻芝已回家休養，但暫時不會致電給她，免得騷擾對方休息，他又表示一班同事會用不同方法開解卓韻芝，森美說：「我會多啲帶佢睇騷，尤其是係band騷，等佢發洩吓。」
採訪：梁錦雯
攝影：陳俊強、葉君海
