裕元(551)集資並無整散個市,恒指同期指於昨早高開後一直守於萬八點關樓上,其後反覆回升,跟住突破18100關口,再創6年幾新高。周五晚美股並無重要數據,市場焦點在下周的聯儲局議息會議,美股同港股好友似乎好有信心。
期指昨升203點,期指淡友慘被挾倉,收市高水成54點,淡友又被「陰」咗一次,趙飛雲近排一路都被呢種欲升還跌,但又跌唔落嘅氣氛影響,搞到無心戀戰,個倉沽剩一隻股票,睇嚟呢種心態要略為調整一下。
中保候低吸納
即使不炒指數股,炒炒唔多跟大市之落後二三線股,在這個大市火熱時期,應該唔會有好大問題,好似光大控股(165)長期立地成佛,近幾日竟然可以一飛沖天,當中有何提示,係時候認真思考。除光控外,紅籌股重組陸續有來,較早前同文郭兆誠兄提及隻中保國際(966),最近兩日升到識飛,且看下周會否調整,屆時會考慮候低吸納。
太古A(019)早排獲施懷雅家族增持,日前睇港交所(388)嘅股權變動資料,發現上周又獲CapitalGroup增持200萬股,涉資逾1.6億元。太A早排由85元樓上跌落嚟,最低都係落到81.65元,近兩日彈返上去,如果有80元水平,趙飛雲打算補番些少高位沽出嘅貨。
富豪酒店(078)曾升上0.78元,差一格就到52周高位0.79元,收0.76元,繼續橫行整固。日線圖富豪已經非常超買,橫行多兩三日,令技術指標回落,反而係好事,只要消化完短期超買,破頂只係遲早嘅事。
趙飛雲