財務委員會選主席親政府陣營早排爆單「無間道」出嚟，一時話「二五仔」係泛聯盟，一時又話係自由黨，又話中聯辦插手捉「二五仔」。
原本呢啲嘢，政圈當茶餘飯後笑話，笑完就算，點知大班同泛聯盟老友石禮謙出頭，一於同田少打筆戰，互數對方。有立法會議員同八方講，成單嘢梗係冇咁簡單啦，佢估背後咪又係煲呔、肥龍、商界同自由黨啲恩恩怨怨，加埋選委會選舉期近，先會將呢啲嘢小事化大！
110票在手頓變二五仔
呢個民主派議員話，係人都知大班另一個外號叫「煲呔針」，佢同煲呔關係心照不宣；煲呔、肥龍同田少面和心不和，更加係公開秘密。佢話肥龍最憎自由黨識問政府要政治着數，但要佢哋「歸隊」撐政府，就成日跳草裙舞。就好似前日反對銷售稅辯論後，唐英年失蹤咗40分鐘先見記者，開頭呢個議員以為唐公子太㷫所以唔見人住，後來聽聞話肥龍拉埋唐公子一邊，好似數某啲人唔聽話，肥龍數邊個黨大家心照不宣。
自由黨轉軚？大班靠估
田少一早話明，今次選舉委員會要攞110個位。民主派議員話，若然真係畀田少攞到100個以上選委，煲呔要連任，就要睇田少面色做人，而且到時自由黨開嘅政治着數清單一定唔嘢少，所以若果借呢單嘢，插自由黨係「二五仔」，等自由黨攞唔到咁多選委會「餅仔」，煲呔就可以唔使睇自由黨面色啦！
同一道理，田少一定要同「二五仔」呢個名劃清界線。若然阿爺當佢食碗面、反碗底，必定冇運行，所以無論如何，都要將隻鑊卸落泛聯盟身上！
至於真相呢？除非做嗰個肯認，其他人都係估估吓！不過八方聽聞石禮謙對田少篇文好嬲，因為佢最㷫係乜嘢事都好，冇理由搞埋佢屋企人，因為田少爆佢大佬同大班搞生意！
噚日田少、大班回應呢單嘢，大班話自由黨吞併泛聯盟不成懷恨在心，佢都係聽番嚟，都係從表面分析自由黨有着數，估係自由黨轉軚，只係田少自己對號入座，佢都冇辦法，佢只係仗義執言喎！佢又話同田少唔係好朋友，但都加番句大家都係紳士。田少就堅持冇講話要吞泛聯盟，佢亦只係講石禮謙，唔係擺中聯辦上枱，因為中聯辦真係搵過佢哋，佢哋真係冇轉軚。而大班話同佢唔係朋友，田少話："Idon'tcare!"（我唔介意！）