何超儀噚日推出新碟，為咗宣傳造勢兼拍MV，竟然挑戰法律、化身快閃黨反轉銅鑼灣鬧市，公然喺車水馬龍嘅馬路上開騷。
聲浪大場面亂
由於超儀事前冇申請，所以佢先安排一架貨車泊喺第一個獻唱地點——記利佐治街嘅禁區位置，嗰度4點後改為行人專用區，不過超儀4點前已經到場，仲跳上貨車連唱兩首新歌，吸引近百市民圍觀。因為現場車多人多，加上聲浪好大，場面都幾混亂，最後佢獻唱10分鐘就走人。
之後超儀移師到SOGO後面嘅行人專用區拍攝，唱到差唔多尾聲先有警察到場，超儀及後表示自己唔係要挑戰法律，佢話：「我哋都係拍MV啫，現場又有工作人員維持秩序，如果有警察嚟，我哋都會走。」超儀話假如場面混亂或者發生危險，一定即刻停拍。
另外，超儀個賭王老竇何鴻燊早前話諗過幫乖仔猷龍個BB女改名叫「開心」或者「開胃」，最後決定叫「開梓」，超儀前晚出席Versace晚宴時話：「我爹哋好幽默，不如下次改『開大』啦！」
