黃霑在04年11月因肺癌病逝，彈指間已經過了兩年，跟霑叔相交40年的老拍檔顧嘉煇，至今依然無法釋懷，霑叔的影子，一直與他常在。
煇哥重提霑叔，雖然滿有欷歔，但感覺是戀棧、回味，他徐徐說：「我成日都醒唔起佢已經過咗身，有時見到有乜好嘢，諗住同黃霑分享，至諗起佢唔喺度，會好失落。我溫哥華間屋嘅書房，擺喺枱頭嘅係佢同我一齊影嘅相，唔能夠忘記佢。
「最難忘係有年我哋去日本參加東京音樂節，呂方唱一支歌，黃霑指揮一隊好多人嘅樂隊。我哋日夜對住好開心，佢成日開玩笑，嗰段時間之後，我哋感情昇華咗，返嚟後傾起，大家不如做個騷啦，嗰時仲未叫煇黃。我哋曾經合作過四次演唱會，最記得係99年12月開嘅演唱會，大家一齊倒數，跨世紀呀。」
以前霑叔曾稱從來沒有跟煇哥吵過架，煇哥笑說：「係呀，冇鬧過交，啲人頂佢唔順，佢同徐克嗌完大交，第日又冇事；啲人話佢寫詞唔肯改，有啲唱片公司、歌星都唔敢叫佢改，佢即刻『媽』㗎，但我一個電話打畀佢，佢又會改，可能佢覺得我講嘢有道理，唔係佢咁有理冇理都講出嚟先，呢個係佢短處亦係佢長處。我自己好保守，希望學到佢少少已經夠，有佢喺度冇冷場，佢同我係好好傾，無所不談，但關於感情嘢，佢從來唔提一句。」
煇哥說自從霑叔離開後，自己都睇化了：「要諗盡量令自己開心啲，唔開心嘢盡量唔好記，我好努力畫好自己嘅畫，好努力做好音樂，食嘢小心啲，好多朋友話我開朗咗，其實你哋講嘅嘢就係一面鏡，照住自己。」
月尾舉行畫展
這兩年煇哥由音樂大師轉變成畫家，在加國重執畫具，專注畫風景油畫。他和胞姊顧媚、胞弟顧嘉鏘已定於本月31日至下月2日，一連三日假中環大會堂舉行「萬水千山總是情──顧氏姊弟三人展」，本月30日則舉行預展，屆時到場嘉賓包括汪明荃、霍震霆和民政事務局局長何志平。
煇哥說：「我家姐畫新派水墨畫，已經係被認同，我初出茅廬，黐埋佢度叨光，我幾十年前都有畫，後來啲時間放晒做音樂，就丟低咗畫畫，呢兩年幾畫番係受家姐影響，今次仲係我諗搞呢個畫展嘅。」
攝影：陳偉權
化妝、髮型：VanessaFung
服裝：GianfrancoFerre