官恩娜（Ella）在中秋節出席活動時遭男歌迷強吻，她之後出席各活動時保安人數明顯增加，不過昨日她與關楚耀、許懷欣、藍奕邦等人於深水埗廠商會中學出席「卡拉O！BABE飛躍校園」，就只得女助手陪伴。
注重公民教育
Ella表示心情經已平復，提到一名專影模特兒敏感部位的口罩怪客，Ella就慨歎防不勝防，她說：「真係冇得去防禦，就算你走埋去問佢，佢話係支持個藝人都冇計，或者叫啲保安同助手認住呢啲人個樣，睇緊啲。」Ella又認為公民教育很重要，她續說：「其實唔好話藝人吖，就算普通女仔係咁俾人影住個胸同走光位都會驚啦，呢啲簡直係精神侵犯。」當問到Ella自從被人強吻後會否希望有男朋友保護自己，她表示現時以工作為先，她說：「我真係冇人追呀，不過我揀男友一定要風趣幽默，但係一定唔可以留長指甲。」
採訪：李珮洳
攝影：葉君海
