兩日無開電腦，電郵多到爆炸，有封係南美洲嘅老友寄嚟喎！
阿歷斯原本係住喺三藩市嘅美國仔，佢老竇幫西班牙佬公司打工，所以要佢學好啲西班牙文，第時做繙譯可以賺多啲錢，咪掟咗佢去厄瓜多爾嘅首都基多市囉！
識踢波易識朋友
去基多最好識踢番幾腳，因為英文講得再好，都只係雞同鴨講，未必有踢波咁易識到朋友！等阿歷斯佢一放學，就同班的士大佬踢波，幾十部的士泊喺草地，唔知仲會以為佢哋罷工㖭！
點解班司機個個上身都咁厚嘅？哦！原來基多位於海拔2,400米的安第斯山脈上，當地人生活於稀薄空氣中，要攝取更多氧氣，心臟及肺部的尺寸，普遍比喺水平線生活嘅人為大。
坐吊車挑戰安第斯山，呼吸加促，講多句都喘氣。去到瞭望台有檔五顏六色，插滿吸管嘅舖位，以為係賣果汁嘅，點知係賣氧氣！遊客坐低畀錢就可以盡情咁索。
基多確係值得去嘅地方，希望與阿歷斯後會有期！
馮嘉奇
碩士球員讀萬卷書，親身歷盡各國足球風情。