年紀大，機器壞，如果唔保持身心健康，好易搞壞自己。一向易嬲嘅煲呔，唔知係咪覺得咁落去都唔對路，噚日喺立法會午宴上，當一班議員為佢慶祝62歲牛一時（查實佢新曆生日10月7日已經過咗，聽日就係舊曆生日九月初一），佢就特別許願話，希望大一歲後可以「知書識禮」，以後唔好再激議員。睇嚟佢真係知驚，擔心再咁易發嬲會影響心肝脾肺腎功能喎。
周一嶽笑番晒
前日同議員因為禁煙問題片到飛起嘅周一嶽局長，就同議員談笑風生，好似冇隔夜仇咁款。周一嶽話，個個都係朋友，無分黨派。但有議員話，周局長喺席間都呻過，自己有成四分一時間擺喺立法會，暗示好盡心盡力㗎喇，點解仲要成為戰靶？
一向口多嘅肥龍就幫周局長講好話，話建議設煙房都係為煙民着想啫，議員唔使鬧成咁呀？不過，由於肥龍本身都係煙民，所以唔方便講咁多喎。原來噚日仲有成班男拔萃舊生同枱，包括湯顯明、何志平、張宇人同范鴻齡，於是大家就講起，遲啲去唔去40周年校慶，趁機敍舊。
