不擅詞令、內向保守，一直是本地殿堂級音樂大師顧嘉煇的形容詞，自從摯友黃霑和羅文相繼離開後，反而令煇哥參透生死，明白做人最緊要開心。煇哥說自己若能學到多少霑叔的大情大性真我性情，於願足已。
煇黃雙劍合璧的架勢至今後無來者，雖然時下湧現不少音樂創作人，但對於常被指涉嫌抄歌的雷頌德，煇哥一語篤爆：「我相信真係喎！」他還知道時下潮玩msn、聽mp3、興網上格鬥遊戲，更懂得下載電視劇，還大讚「Hilda姐」鄧萃雯演《女人唔易做》冇得頂。
75歲的煇哥勁yeah，他有沒有學到霑叔的好玩率直精神？你話呢？ 撰文：朱倬誼
近年顧嘉煇退休後移居加拿大溫哥華，雖然已年屆75歲，但他懂得與時並進，愈活愈精采，完全未out過，而且in到你唔信。煇哥說：「我喺溫哥華有訂香港報紙，劇集都有睇，朋友喺網上download畀我睇嘅，香港劇集喺呢度要遲成年至出。」問煇哥近來愛看哪套電視劇？他即時說：「《女人唔易做》，鄧萃雯做戲冇得頂！佢做女強人做得好似，唔會太過火，好好。」說時他更豎起拇指大讚，但問他愛看哪位男藝員？他猶豫一會才說：「阿旦（鄭丹瑞），做咁耐仍然咁活躍，好得體。」
「陳輝陽寫抒情歌好」
既然有煲港劇，煇哥當然有留意本地樂壇，目前當紅的作曲家有雷頌德、陳輝陽、伍樂城和王雙駿等，記者給他看過四人的歌曲作品紀錄後，煇哥說他沒有留意曾寫梁漢文《新聞女郎》和草蜢《我們》的王雙駿；他聽過曾寫Twins《風箏與風》和李克勤《合久必婚》等作品的伍樂城名字，卻沒有給他評語；但對陳輝陽則有反應：「《Shallwetalk》、《K歌之王》，哈哈，王菲首《暗湧》，但唔係好記得個melody。陳輝陽寫抒情歌幾好，有啲歌幾正統。」
至於屢被指抄歌的雷頌德，舉例他98年寫給黎明的《眼睛想旅行》涉抄雪兒（Cher）的《Believe》；今年寫給側田的《決戰二世祖》也被指抄襲黑人歌手Akon的《Lonely》，煇哥竟然勁精靈，對雷頌德涉抄歌一語道破：「我相信真係喎，周圍攞啲唔係咁多人攞靈感嘅歐洲、英國歌曲。」你又知？「我自己周圍摷歌聽㗎！好鍾意上mp3.com，自己download啲歌落嚟聽！」
70年代和80年代，我們的電視劇主題曲，唱到家喻戶曉，但現今的電視劇即使收視勢如破竹，要令人記起劇集主題曲實在太難，對此煇哥也很認同：「世界有好多嘢吸引人注意，網上打機，網上遊戲同人鬥，殺咗幾多個、武器有得炒賣，又有手提playstation、玩icq、msn……」記者不禁聽到瞠目結舌，煇哥太潮爆吧！但他繼續說：「仲有好多原因，有商業因素，電台播電視劇主題曲唔多，就算搵容祖兒呢啲名歌星唱，都係由唱片公司提供歌曲畀電視台，想用電視台打造自己隻歌。」
捧藝員做歌手唔掂
大抵因為無綫意識到這個問題，才要捧藝員做歌手，於是推出由旗下小生和花旦分別灌錄的《男人魅》及《女兒紅》大碟，但煇哥直言唔掂：「咁就梗係唔得啦，鄭少秋以前夠係娛樂唱片咯，但我哋係知鄭少秋唱，為佢度身訂做首歌，羅文都係同佢度身訂做主題曲，𠵱家冇啦，都係公司同製作公司揀隻歌出嚟畀佢唱嘅。」
