美股繼續推上，道指升幅唔大，但係最重要係企喺12000上面收市，滿足咗投資者嘅願望，跟住會點？唔使知，只要美股唔大跌，穩穩陣陣慢慢郁，咁港股就可以繼續炒上，昨日恒指又掉頭炒上，好似話畀大家聽港股嘅技術調整已經完成，恒指收18113，上試18400嘅目標又邁進一步。
下個禮拜個市會點？可以睇好。禮拜五即月期指結算，好友𠵱家可謂控制大局，工行（1398）喺同一日掛牌，又准窩輪同日發行，大家都應該估到個市會點走，淡友𠵱家處於劣勢，只能且戰且退，玩下轉倉。至於美國聯儲局議息，市場已預咗利率不變，美股嗰邊仲炒緊，對港股好有利。形勢比人強，造淡都係要忍吓。
紫金C輪1373：啲金價持續反彈，盎斯金升到600美元附近，睇個勢會上試610美元，油組話每日減產120萬桶，金價有機會短暫突破610美元，如果昨晚就出現呢個情況，紫金（2899）下個禮拜一就會好生猛，昨日升上4.67元收市，成交大增，技術走勢好靚，股價耷咗咁耐，有機會「發圍」，睇怕上試5元都冇乜走雞。
紫金C輪1373昨日報收93仙，槓桿率5倍（有效3.5倍），對沖值0.7，引伸波幅55%，正股升上5元，1373應該會喺1.15元樓上，正股破關上試5.30元，隻輪應該會上試1.40元，買番啲，正股跌穿4.45元止蝕。
俊樺