鐵皮檔係香港人集體回憶，對檔主下一代嚟講就係傷痛回憶，因為牌照唔能夠傳畀子女，持牌人去世後，碩果僅存嘅鐵皮檔惟有結業，「順興」鐵皮檔嘅陳先生就係個活生生例子，「老竇過身，持牌人轉咗我阿媽，唔好彩講句阿媽有乜事，個檔就玩完喇。」講到好悲哀，不過始終係爸爸留低嘅檔口，佢決心捱落去，「梗係想搬入舖啦，不過搬入舖就無晒風味，我呀，希望可以做到死為止。」近年，佢請咗夥計幫手睇檔，唔使一腳踢，「舒服啲囉，我做三文治、沖嘢飲，車仔檔咪交畀夥計做囉。」
「順興」主打嘅唔係車仔麵，係腸粉，陳先生回憶：「30年前我老竇擔住啲車仔餸上寶馬山，賣畀山上木屋區住客。因為上山淥唔到麵，所以咪用腸粉代替囉，以前淨係得豬皮、魷魚、螺肉呢啲餸咋，豬腸、豬紅、雞翼尖無得賣㗎。」陳先生接手後，餸多咗，賣埋麵，不過始終腸粉最受歡迎，一日賣成300條。話埋你知，呢度每日下午4點半準時收檔，車仔麵呢，2點已經賣晒，想食，趁早唔該。
記者：黃若茵
攝影：林栢鈞
車仔腸粉
腸粉每條$1、餸每款$3.5、豬腸$4.5，經濟到爆。陳先生話：「所有餸都係我自己醃製，好似魷魚咁，要浸3日㗎。」我推介魷魚同螺肉，夠爽。
蛋牛治$10.5
嘩，真係好味，鹹牛肉絕無話過鹹，牛肉炒到散散哋，散成小小肉粒溶入熟蛋，味道剛剛好。
奶茶熱$9凍$10
陳先生做嘅絲襪奶茶好滑，梗係啦，話晒都有幾十年功力，我就Order杯少甜嘅，飲多杯都唔覺膩。
順興（25766577）
地址︰大坑京街22號後巷