食大閘蟹，個個都懶有嘢咁話要嗒番杯花雕酒，李純恩就話太雕十六仲正：「不飲太雕酒，白來世上走。」係就係誇張啲，不過太雕十六確實酒香醇厚。不過你咪懶醒，太雕十六並唔係花雕酒嘅一種，係紹興黃酒中嘅極品，唔只配大閘蟹，入饌一樣掂，呢餐想唔飲飽食醉都幾難。
記者：黃若茵
攝影：伍慶泉
陳釀芙蓉大花蟹$298
大花蟹重約1斤至1斤4両，大廚話：「將半熟花蟹，放入混入咗太雕嘅蛋白，再蒸至全熟。一蒸，太雕酒香直接滲入花蟹，多水多汁好有酒香。」滑溜蛋白好軟綿，蟹肉夠鮮有酒味，食蟹箝記得啜埋入面啲汁呀。
10人隊30斤易醉
酒名太雕十六，「十六」，唔係指釀酒年份，而喺釀酒嘅成份。李純恩4年前帶團到紹興，第一次接觸呢隻酒：「太雕十六其實由六至七種酒溝埋釀成，當中加飯同善釀兩種黃酒佔最重成份，每樣落大約八両，八両加八両等於十六両，所以咪叫太雕十六囉。釀酒年期8年度喇，啲酒已經好醇厚。」我純情，本身唔飲酒，勉強試一啖，咦？甜甜哋不失酒香，口感幾滑嫩吓，唔覺唔覺就隊咗成杯落肚。李純恩話：「一般黃酒比較苦，要落話梅調味，太雕十六本身夠甜，如果你飲太雕落話梅，一定俾人鬧嘥酒！我第一次喺紹興咸亨酒店試呢隻酒，覺得好醇唔難入口，一行10人總共飲咗30斤，唔覺唔覺好易醉㗎。」
入饌唔苦澀帶甜
齋飲係好味，咁入饌又點先？大廚話：「中菜不嬲都有用開黃酒入饌，不過黃酒比較難控制，好容易煮過龍，一煮過龍食物就會變苦澀。仲有呀，加黃酒入饌聞落係好香，不過食落好多時都會唔夠味，因為酒香好易揮發。太雕就唔同，隻酒本身夠香濃，味道持久兼甜味重，煮耐咗都唔會變苦。」為咗今次嘅陳釀太雕菜，大廚自己都試食過無數次先滿意，「最難做係一味東坡肉，要做到皮起膠肉唔亁，太雕酒味道又唔可濃到蓋過肉香，好難。」難唔難，唔關我事，淨係知如果點菜都懶，不妨一試「陳釀太雕×大閘蟹宴」（每位$198，最少兩位，包1道前菜、1個燉湯或鮑參燴花膠羮、1隻大閘蟹、2道主菜及1道甜品），有乜着數？送你一支太雕十六囉，想食？練定酒量喇。
a.太雕醉乳鴿$78
大廚話：「煮熟乳鴿，加花椒、八角用太雕浸20至30分鐘，浸完雪凍先食，本來諗住做熱食㗎，後來發覺做冷盤仲香。」的確有濃烈酒香，最欣賞係鴿肉片好先上碟，唔會食到杉晒口無晒儀態。
b.一品東坡肉每位$28
大廚話：「肥瘦相隔五層肉，加太雕、薑、葱、醋調味，用瓦罉煲3個鐘，再用文火煲到收水，肥肉入口即溶。」即溶就誇張啲，不過絕對唔油膩，味道口感攞滿分，一嚿肉送到一碗白飯。
c.太雕文昌雞半隻$70 全隻$150
大廚話：「我用海南島文昌雞，貪佢皮薄少油。煮嗰陣要將隻雞打側放浸喺酒入面，煮熟一邊再煮另一邊，咁樣成隻雞先夠酒香。」我覺得塊雞皮最好味，滑到自動跣入喉嚨，酒味反而較淡。
d.糖酒玉蘭遠$58
大廚話：「赤砂糖溝太雕炒芥蘭，芥蘭嗰陣獨特菜香同太雕甜味最夾。」賣相係似茶餐廳$10貨色嘅郊外油菜，咬落菜汁有酒香，菜葉最多汁，諗起都口水流，抵你收我差不多六條嘢。
e.清水大閘蟹5両重$68 7至8両重$108
李純恩話：「太雕配大閘蟹，好甜，食到嘅係好天然嘅甜味，唔似其他黃酒加話梅，甜味唔夠均勻。」蟹係牧牛湖大閘蟹，用清水加紫蘇葉白烚最好，白烚，蟹膏會多啲水份，入口更滑。
f.太雕酒$88
食得開心，想散買番支太雕酒返屋企慢慢歎？每支250毫升$90有找，啱嘴形就買喇，況且個酒埕仔咁型，買番屋企擺都抵呀。
食客有Say
睇埋裝修
搵食攻略
八月花（23330222）
地址：九龍塘又一城G-25店
營業時間：周一至六11:00am-11:00pm，周日及公眾假期10:00am-11:00pm
交通：九龍塘火車站下車，周一至五惠顧滿$500獲1小時免費泊車
全店座位：210個
人均消費：$100
有着數：惠顧滿$100即送$15美心現金券（適用於全線美心餐廳或餅店）
最好賣：脆脆BB豬，日賣150份
註：粵翠軒、翠玉軒、怡翠軒、翠晶軒、海逸軒、粵江春均可享用陳釀太雕菜