曾經死過人嘅地方，從風水學嚟講，往往係亡魂聚集場所，亦係陰氣最重之地。除咗傳說中擁有陰陽眼嘅人能夠接觸到靈界物體之外，呢一刻，你拎住部手機亦都可以！講緊嘅其實係3G手機遊戲《黑夜女神》，佢最「猛」係將手機變成搜索靈體嘅道具──羅庚，只要拎住佢四周圍行，你隨時會發現靈體嘅蹤影，話唔定𠵱家就喺你隔籬。
記者：陳國輝
攝影：周旭文
Model：King、Neyuna
以往手機遊戲只要靜靜哋坐喺巴士位上，已夠你消磨粒幾鐘。但呢隻Game絕對唔容許你咁做，玩家要借助遊戲提供嘅捉鬼羅庚（即係3G定位系統），逐區搜索靈體位置，將鬼魂統統捉起，以收集最多、最齊為之贏；眾天師之中嘅勝出者，更可獲網絡商贈送海洋公園哈囉喂入場門券，參加一年一度哈囉喂Party！玩完呢隻遊戲等你嚇餐飽之後，再入「鬼城」嚇多次，你有冇咁嘅膽量先？
遊戲收費：$20（a）
註：每搜索一次鬼魂位置，會收取一個多媒體訊息費
鬥快捉鬼
呢款遊戲唔單只講求膽大，仲要以最快速度完成任務先為之勝利！今次我哋搵嚟少女版馬小玲Neyuna同高佬阿King「落場」體驗兼鬥快捉鬼，究竟邊個同靈界有緣啲，即睇！
技巧一：進入鬼域
捉鬼技巧之一，係要懂得揀陰寒之地，呢樣嘢Neyuna就識得利用手機Search番各地區嘅鬼數目，然後去番嗰區捉鬼。「當我用『最新鬼蹤』嚟搜索靈體位置嗰陣，我發現旺角、尖沙嘴兩區加埋已經有300隻鬼咁多，而其他地方只係得幾十隻，唔使諗一於喺油尖旺一帶捉鬼啦！」不過要留意搭車嗰陣以及冇3G訊號嘅地方都玩唔到，萬一羅庚失靈都幾大件事。
技巧二：避免重複
雖然油尖旺區遊魂野鬼最多，但並唔等於捉晒佢哋先至勝出！Neyuna話要贏對手可以好簡單，技巧就係挑選捕捉唔同類型嘅鬼，切忌重複。「每次Search鬼魂位置之前，我都會先Check吓手上份鬼名單，睇吓有邊種鬼仲未捉到，或者邊一種已經重複咗，盡量避開佢哋。」準備捉鬼嗰刻，記住確定自己已身處鬼魂範圍（地圖上嘅藍色圈），咁就萬試萬靈。
技巧三：天師報料
相比少女版馬小玲，高佬阿King明顯輸蝕咗。因為佢單憑直覺以為荒郊地區必定係遊魂野鬼聚集之地，佢到達元朗Search先發現，原來呢區只係得33隻寃魂，簡直少得可憐！不過佢都唔蠢，好快就識進入遊戲裏面嘅「聊齋」（即係Blog）尋求其他捉鬼天師協助，快速搵人報料，不過啲料堅唔堅真係好難講，阿King話：「個Blog入面有啲人都唔係講鬼，係講緊幾時返大陸玩，真係俾佢激死！」
激玩哈囉喂遊戲
如果嫌四周圍捉鬼太過操勞，又想靜靜哋歎住打機嘅話，以下幾款考反應、考智力嘅鬼作可能會幾啱你！
《魔界村》經典回味
呢隻Capcom名作喺近期PSP版玩得咁激，嚟到同系列手機版又點可以失威！講畫面就肯定冇得比，之但係動作尚算自然流暢，喪劈惡鬼、跳嚟跳去嗰陣都唔會窒晒格，撞正哈囉喂回顧經典鬼Game都算係時候！
收費：$25（c）
《造型大賽》化個鬼妝
去「趴地」除咗幫自己化番個鬼妝，仲可以幫卡通人物化妝㗎！呢隻Game提供近百款臉相、頭飾、衣着俾你揀，打扮完仲可以SendMMS畀老友做Wallpaper，而頭5位最佳造型獎得主更可獲精美禮品㖭！
收費：每月$20（b）
《猛鬼酒吧》考智力
動作Game玩得多都會悶，而智力遊戲就唔同，起碼男女老幼都啱，冇年齡限制！呢隻Game屬於方塊類遊戲，最搞鬼係方塊全部會變晒萬聖節嘅南瓜、妖怪，背景仲係一幢古堡㖭，但玩落就覺得Cutie多於恐怖！
收費：$25（c）
《鬼屋波子機》最易玩
我諗冇人未玩過撞磚遊戲！小記都算係由細睇到佢大，每一次都有新花款，例如今次就以哈囉喂為題，一邊撞磚拿分之餘，仲會遇上精靈及惡魔纏繞着你，但查實玩落都相當之Easy，係唯一一隻唔使用腦嘅遊戲！
收費：$25（c）
《怪誕城之夜》畫面靚
每次諗起鬼怪題材卡通，唔係㗎仔製作嘅《鬼太郎》，就係西片《怪誕城之夜》！呢隻Game畫面夠晒細膩，主角傑克只係負責將路上嘅障礙物搬走，取得聖誕老人嘅禮物就叫完成，總數有100關，又要考考你智慧！
收費：$20（b）
單撈乜鬼都有
除咗打機，玩得3G當然唔少得提供哈囉喂Content俾大家單撈落機，最例牌嘅「菜式」好似Wallpaper、MMS、Ringtone必定有齊，不過Peoples就結合咗港女至冧嘅HelloKitty、大口仔以及米奇老鼠卡通人物；另外One2Free亦大量供應廸士尼卡通Content，總之乜鬼造型都有！
捉鬼天師玩後感
Neyuna有新意
「要拎住部手機四周圍搜索鬼魂，呢種玩法幾有新意㗎！但假如得自己一個玩實在太悶，最好約埋成班Friends大家鬥快捉鬼，咁玩先夠刺激！」
King無聲差啲
「唔識玩上Blog求救都係一個唔錯方法，順道仲可以認識其他朋友㖭！但最可惜係隻Game全程唔Support音樂，點都會少啲氣氛啦！」
查詢：
（a）3香港（31628888）
（b）One2Free（25123123）
（c）SmarTone-Vodafone（28802688） （d）Peoples（29458888）