新地二佬郭炳江（圖）噚日應邀做澳洲會計師公會舉辦嘅亞洲經濟研討會演講嘉賓，講題係中國房地產市場。
洋名湯馬士嘅郭二佬，演講精要簡單，開場白係先同大家玩問答遊戲熱吓身，兼且畀大家了解吓中國之大。
湯馬士問：美國擁有一千萬人口以上嘅城市有幾多個？有人答四個，亦有話係六個，當然亦有人答啱──係兩個──就係紐約同羅省；而五百萬人口嘅城市又幾多個，答案係八個。咁大陸呢？分別係九個同八十八個，呢題就冇乜人識。
就係因為中國咁大，每個地方都有各自市場特色，所以湯馬士話，新地只會集中精力做好四個大城市嘅房地產業務。咁喺國內做房地產最大嘅挑戰係乜？佢話同國內嘅大發展商交流過，唔係錢唔係冇地，而係要搵適合嘅人才協助管理全國業務呀！