大班請食飯，拎張黑卡出嚟找數，卡士係唔同啲。佢唔淨止找一餐，連過往舊賬一併埋晒單，因為佢平時到Ｙ記食飯，有時行色匆匆，叫一聲「入我數」就鬆咗人，Ｙ記於是同佢開一個戶口，等佢得閒上開嚟就一次過找清。
講起黑卡，據說一卡通行全球，服務無以尚之，譬如暑期遊學團去到英國，有學生病咗，英國醫生同香港低年級學生用英語溝通唔方便，香港家長要求搵一位在倫敦行醫、懂廣東話嘅醫生，黑卡就可以安排得到。大班去巴黎之前，如果要揸車，黑卡會安排一架大班愛車（香港揸開嘅型號）擺在酒店門前。
用卡有威風，失卡就好杰。大少Ｗ某次到灣仔某私人會所游水，荷包放在西裝，掛在locker內，游完水，在餐廳嘆咖啡之時，收到某銀行Ｖ卡電話：「Ｗ先生請問係唔係喺又一城某店買咗金飾，成十萬銀？」大少Ｗ為之愕然，摸吓荷包，全部信用卡都喺度吖，冇唔見呀，點解有人在又一城碌佢張卡？收線之後，立即打電話去各銀行停用身上幾張信用卡，一啲一打就通，立即停用，但一張Ａ卡就煩咯，電話另一邊講：「對唔住，現在綫路繁忙，如有乜乜請按1字，如有物物，請按2字，如有ＸＸ請按3字，如有ＹＹ，請按4字……」大少Ｗ正在心急之時，煩到撞晒火，十幾分鐘之後，卒之有人同佢講電話，聽見報失停用，對方話：「對唔住，過往十幾分鐘，你張卡已經過咗數五萬幾！」
據大少Ｗ後來發現，有專業盜賊攜帶電子儀器，在會所lockerroom搵食，開locker把鎖，易過借火，開完就碌信用卡，將啲資料入晒部電子儀器，信用卡放回原物原位，當事人唔會發覺，俾人在外猛咁碌卡都未知。據講有某銀行推出信用卡保險，失卡之後，只打一個電話該銀行就會代你停晒你所有嘅信用卡，唔使你煩。