今日刀仔鋸大樹，容許筆者用多兩注出擊，因為如果開到個屈福特贏「客其他」嘅大冷波膽，再中多另一場已經贏到笑！
查爾頓及屈福特兩軍喺今季英超聯「包艇」，今周前者主場對碰，上演倫敦同市打吡。睇番兩隊今季整體表現，其實大家都有幾位質素唔錯嘅前鋒，只衰在防線不穩，呢次碰頭，除咗入球「大」可期，不妨博冷啲，向屈福特贏波波膽埋手，仲要係博「客其他」！
1860慕尼黑穩入兩球
1860慕尼黑今季主場3戰表現對辦，共計得到2勝1和，每仗都有入球，共入6球，平均每場入對手兩球；該隊於德乙聯本輪秩序主場迎戰凱沙羅頓，凱沙羅頓今季客場成績頗令人失望，4戰輸兩場，入球隔場出現，前次作客淨負羅斯托克0:2，上仗作客1:1和安達赫治，一於博其今日又冇波入，敲主隊淨勝2:0。
馬略卡今季喺西甲聯演出平穩，未見大上大落表現，保持住每場冇乜入波同失波，開「細」多過食飯；今輪佢哋嘅對手皇家蘇斯達，整體表現不濟，作客每採取穩守突擊戰術，的確減低失球數字，但前面唔識入波，依然輸多贏少，相信今仗馬略卡可以小勝。
畢爾包作客強主場弱
畢爾包近幾季有個現象幾特別，一係就主場威晒作客唔掂，一係就相反作客好勁主場唔掂；今季佢哋又見出現後者呢個情況，作客波頻頻搶到分，上周仲打開埋今季勝門；但主場就唔得。今輪迎戰擅打穩守突擊嘅切爾達，照睇畢爾包又會送分畀人使，博埋客軍贏波波膽都得。文：華度