唔知係咪Game迷打PS2同XB360打得太多太膩，定係年紀開始大，想重拾昔日回憶，忽然想玩番當年嘅超任遊戲。喺遊戲網上討論區，有位仁兄因為執屋緣故，搵番晒當年令佢廢寢忘餐嘅經典超任Games出嚟，仲放上網希望同朋友仔分享。點知引嚟大批超任Fans，每日詢問樓主仲有冇邊隻經典Game，如《SD快打》、《兵蜂》、《足球小將》，亦有經典到連筆者都唔識，例如當自己係條魚再進化成人嘅《46億年物語》。有求必應下，網民封埋佢做「超任博士」。
雖然用PC打番超任Game屬侵犯版權之舉，不過目前的確有唔少機迷總有幾款模擬器「看門口」，有啲甚至Crack埋PSP出街打㖭！問番佢哋打落有咩感覺時，個個都笑住講番當年玩磁碟機嘅開心事。有網民仲話，自己同阿媽一齊玩緊《俄羅斯方魂》；亦有人話呢啲超任Game陪住自己成長。講講吓，筆者當年買第一部遊戲機就係美版超任，𠵱家仲放喺屋企。唔知仲玩唔玩得番當年心頭好《FinalFight》呢？
記者：陸俊雄
網址： http://discuss.com.hk