主打豪宅同商廈租務嘅領域物業加強網上服務，力攻外籍客市場，聽領域執行董事羅禮才講，佢哋大搞嘅網上地圖，最啱外籍客使用，因為外籍人比較多用互聯網溝通。
呢個網上地圖有幾勁，羅禮才話最煞食係有大量圖片，特別係單位內櫳相，咁啲客咪容易揀到心水盤囉。佢透露𠵱家已經影咗1萬幢物業嘅相，遲啲仲會加多啲，因為有專人負責影相，而前線同事都要幫埋手。淨係呢方面嘅投資已經用咗500萬至800萬。
點解領域要大搞網上地圖，原來領域每個月收到500個網上問盤，做成嘅交易有100宗。
為咗要為外籍客提供一條龍服務，佢哋可以為單一集團高層以至一般外籍員工都提供租務服務，由董事級嘅超級豪宅，到東涌幾千蚊租盤都會做。羅禮才話，外籍客嘅生活圈子較細，若果做得好，透過口碑輾轉介紹，就唔憂冇客源。
個網上地圖除咗住宅外，遲啲仲有商廈同舖位資料可供查閱。想知道有乜嘢睇㖭，可以登入www.hongkonghomes.com睇吓。