中國第二號有錢人、國美（493）主席黃光裕隻國美成功吞咗永樂（503），令其進一步鞏固第一大電器零售商嘅地位，華華仲以為第二時啲供應商會更加冇啖好食。點解咁講？皆因睇內地報章，成日都見內地供應商喊咁口話俾連鎖店欺壓，話對方要收上架費、宣傳費之餘，有乜特別喜慶，又話要收慶賀費，搞到飯都冇啖好食。
港精英又輸一仗
不過呢支歌仔冇得唱喇，𠵱家啲供應商有救！話說商務部噚日宣布《零售商供應商公平交易管理辦法》，矛頭直指呢啲問題。根據呢份連發改委、公安部、稅務部同埋工商總局都有份搞嘅新法規，其中規定零售商唔可以再濫用優勢地位從事不公平交易行為，好似同供應商簽訂特定商品嘅供貨合同；又有規定零售商唔可以從事妨礙公平競爭嘅行為，例如唔可以影響供應商嘅定價等等。
所以話，雖然相信見到呢份嘢最開心嘅莫過於一眾供應商，但黃光裕就未必咁睇囉。真係勢估唔到中國政府咁有效率，未等到國美開祝捷會，就率先搞咗呢個《零售商供應商公平交易管理辦法》出嚟！
俗語有云「人怕出名豬怕肥」，唔知中國政府今次咁有效率，係咪同發現原來做零售可以致富有關係呢？不過，好在啲罰款好削，暫時應該唔係大問題。
講開又講，香港成日話搞公平競爭法，搞咗咁耐，今次居然俾內地同志爬頭出咗先，香港班治港精英又使唔使北上偷吓師呢？抑或有其他原因唔搞呀？