美股喺Intel同IBM嘅業績好過預期嘅消息刺激下，前晚突破12000關創新高，但係企唔到喺12000點樓上收市。油價係咁跌，但係商品期貨就繼續炒作。通脹數據參差，下個禮拜聯儲局又開會議息，人心自然觀望，睇怕喺聯儲局會議前，個市都係搵啲藉口炒上炒落，指數實際變化應該唔會好大。
港股仲係窄幅波動，不過昨日就冇咗呢排慣用嘅「回馬槍」，恒指低收，但係跌幅唔算大，61點，成交亦冇大增，仍當高位橫行市睇。
港交所C輪9418：個市等緊消息突破，揸住大藍籌輪等破位，輸時間值，波幅跌得快就更蝕底，揀大隻股份，都要吼啲有異動迹象同埋成交配合嘅股份。港交所（388）昨日報收59.35元，升0.8%，過去幾個禮拜慢慢向上郁，唔經唔覺已逼近60元，昨日向上突破59元阻力位，周線圖都有異動迹象，呢兩日有機會升破60元，如果成交急升，下個禮拜會向65元推進。其實港交所此時推上都唔係冇道理，工行（1398）下個禮拜掛牌，港股嘅成交隨時會突破600億元，炒一轉上去，有「借東風」嘅效果，容易好多，港交所啲C輪自然值得留意。
港交所C輪9418昨日報收1.07元，成交接近1400萬元，係較活躍嘅一隻，槓桿率5.5倍（有效4.7倍），對沖值0.85，屬中度價內輪，仲有88日先到期，溢價2.27%，唔算貴，引伸波幅38.4%，較過去幾日略高，開始有「鑊氣」，街貨雖只有4.5%，但係上升緊，反映炒家開始入市，正股升上65元，9418應該唔會低過1.5元，有成40%以上升幅，呢個價買，正股跌穿57.6元止蝕。
俊 樺