相信大家如果有留意我哋特區嘅上市公司，點樣維繫同股東嘅關係，就會發覺其中一個最重要嘅伎倆，就係出「公告」。呢啲「公告」就係上市公司同市場講關於公司啲嘢。例如有董事辭職、公司轉型、公司大股東有變、主席有喜等等都可以通過「公告」機制去通知股東同其他市場參與者。
喺我哋特區股票市場，孫柏文相信最常見嘅一種「公告」，就係當一間公司股票成交量有大幅變動嘅時候，上市公司出嘅「成交量的不尋常波動」公告。99%嘅「成交量的不尋常波動」公告，都係上市公司澄清董事局、高層完全「唔知點解」成交量大升，公司本身「冇乜特別嘢」發生。
咁星期二朝頭早就有一間公司出咗個呢啲「講咗等如冇講」嘅成交量不尋常公告，去交代星期一突然高出嘅成交量，呢間公司就係做可可豆貿易嘅502環新國際。環新喺星期一嘅成交量比起對上星期五嘅交易日，多出超過十倍，成交量仲要集中喺收市前一小時裏面進行，最後仲令股價升15%。大家可能會問：「咁究竟發生咗乜嘢事？」
其實理由好簡單，不過講之前，我想同大家講環新股價升嘅理由，充份反映我哋特區嘅股票市場裏充斥着好多「奇人異士」，對國際局勢不但瞭如指掌，仲要可以洞燭先機。環新本身做可可豆貿易嘅方法，就令環新喺可可豆價升嘅情況之下，可以直接得益，所以如果可可豆價升環新股價都應該升。不過，如果大家睇番可可豆價呢幾日嘅走勢，就會發覺冇乜異動，而各大報章、傳媒都冇辦法解釋環新點解升，淨係話：「農產品當炒！」
原來，喺非洲早上時間，全球最大可可豆生產國，佔全球四成生產量嘅科特廸瓦Coted'ivoire，佢哋嘅可可豆生產商同政府談判決裂，生產商罷賣。科特廸瓦政府一路都係壟斷可可豆本地採購權，欺壓生產商，生產商如果想將可可豆出口都要畀出口稅，所以生產商希望可以將政府採購價提升同埋減出口稅。不過呢段新聞，就算係被稱為「民營CIA」嘅stratfor.com，都要到特區晚上時間先至出，所以當日特區下午時間有份買環新嘅人，果然消息靈通。
大家可能會問：「不過點解可可豆生產商罷賣，可可豆價都冇乜異動？環新股價都跌番落嚟？」原來，喺99同04年科特廸瓦都發生過呢種談判破裂嘅情況，不過每一次都一個星期之內解決。噚日，已經有消息傳出生產商暫時中止罷賣行動，話畀政府一個星期去接受生產商嘅要求。所以最後，星期一買咗環新嘅朋友，消息就一定靈通，不過真係唔知最終佢哋有冇錢賺。