機管局再次益街坊，由出年1月1日起，向使用細機（百多個座位）嘅航空公司提供停泊費優惠，航空公司只要將細機停放喺6個專用停機位，停泊費減一至兩成。
舉個例子，一架B737飛機停喺就近客廊嘅停機位（圖），每粒鐘收費會由624元減至560元。呢類細機現佔香港機場總飛機起降量三成。
此外，機管局延續01年開始有嘅新航點着陸費優惠，為期兩年，出年1月起，航空公司開辦定期新航點，頭半年嘅着陸費可回扣75%，其後半年回扣25%。
不過，今次優惠冇上次咁着數，優惠期縮短咗，之前嘅安排係開航首年可回扣50%，翌年回扣25%，新安排夾埋嘅優惠期只得一年。04至06年間，共有33間航空公司開辦咗69條新航線，回扣金額有8200萬元，唔知有幾多係為咗回扣而開嘅呢？