「教育沙皇」李國章喺剛公布嘅施政報告中，搶咗煲呔唔少風頭同箭頭，因為佢主理嘅教育統籌局，喺報告中得到眷顧，其中最惹火嘅當然係幼稚園學券制。出生大家族嘅李公子由醫生到校長到局長，職位愈升愈高，權力亦愈來愈大，但不改嘅係佢貫徹始終嘅率直性格同埋口下不留人嘅豪情。
政府線人話，呢種氣概，教統局上下都好一致。有個時期政府雷霆殺校，收生不足者幾乎格殺勿論，一次該局高層喺一個飯局上，揶揄一度因為收生不足而瀕臨關門大吉嘅鮮魚行學校，「佢哋改錯名，如果叫律師行學校就一定收到生啦！」
最近一次仲絕，教統局有高層喺私人場合上自吹自擂，話今年施政報告嘅學券制對於幼兒教育係德政，幼稚園「人人拍手掌，搞到我都唔好意思。」呢位高層話，𠵱家啲牟利幼稚園條氣唔順，係因為「政府阻佢哋發達」，佢愈講愈興奮，話教統局嘅直資學校概念係創舉，好多海外機構都讚許，牙擦擦疾呼：「教統局好先進，醫療都話學我哋嘅學券制」；佢話行得先要俾人鬧，但世界總要有清兵，即係勇字當頭嘅烈士。
線人再報多一單料，話呢個高層解釋點解啲家長拚命送啲子女去勤於操練嘅幼稚園，幾貴學費都不惜，係基於一種投射心態，將自己未達成嘅心願寄託喺子女身上，話佢哋自己做唔成律師醫生就希望個子女還心願，但佢跟住一盆冷水照頭淋，直指：「呢種做法挫敗居多。」
政府中人都俾佢哋吹脹
教統局高層嘅做嘢方法，有時令政府中人亦支持唔住。律政司就有人舉手投訴，話對方好多時諗嘢好自我，淨係以為自己所想嘅係千古絕橋，問佢下一步幾個唔同局面可能產生嘅反效果，對方就會不屑咁話：我哋諗嘢好正面，唔諗負面嘢。吹脹！
言歸正傳講番李國章，佢每次到立法會，對議員罵必還口，一啲都唔客氣，噚日立法會傾學券制，連女議員都中招。最先中招嘅係本身係大律師嘅余若薇，余指既然唔達標嘅非牟利幼稚園可以兌現學券，咁達標嘅牟利幼稚園都應該可以。李國章就鬧佢想派糖撈中產選票，仲寸佢「好似律師咁，少數都……」，佢想講埋「唔好」兩字，但冇講到出口，兩人跟住你一句、我一句鬧唔停，委員會主席曾鈺成叫咗幾次先叫停兩人。
劉慧卿唔值佢鬧議員撈選票，叫佢唔好吓吓都咁講，又叫佢應資助埋牟利幼稚園家長，唔達標嘅幼稚園都唔應兌現到學券。李國章即時發爛渣，話無論學券制計劃點樣，都係會俾人鬧，「如果一開始話牟利幼稚園都得，議員實會鬧有冇搞錯，攞公帑去畀人發達，有冇搞錯……如果話唔達標幼稚園唔可以，你劉慧卿實第一個企起身，鬧我點解唔畀人哋機會改善、點解要咁獨裁。」口才一流嘅李國章，實情係膽識過人。