噚日市場焦點係國內房地產股，世茂房地產（813）及中國海外（688）更加創上市新高。市場人士話，中央認為宏調已取得初步成效，唔會再推宏調措施。
講開中央宏調，有啲措施令人幾難明，例如暫停賣地及頒布命令停建豪宅，係香港早幾年嘅托市措施，點解去到國內變成壓抑樓市？另外禁止境外人士及外資買樓，亦帶來反效果，據國內報章指，新措施令外資企業及外籍管理人員只能租樓無得買樓，間接推高市場租金，部份地區房租升幅驚人，而高租金回報又推高樓價，反而變咗托市措施。
除咗中資房地產股外,噚日有隻股仔湧咗上嚟，中意控股（1198）單日勁升26%，成為升幅榜排名第3股份，有人話係炒內地樓市復蘇傢俬生意好轉。呢間公司今年6月底止業績大幅倒退88%，唔知係咪有春江鴨一早知業績差，股價由4月高位4.7元開始勁跌，上月公布業績再裂口跌穿1元，高位跌超過８成。
高追中國數碼要損手
中國數碼（250）噚日股價一度彈升近5成，收市由高位回落，升17%，波幅非常誇張。呢間公司原本係南海控股（680）嘅控股公司，但係經一輪派送以及調換資產後，南海與中國數碼嘅控權關係已經對調，變成南海持有62.8%中國數碼，財技令人大開眼界。中國數碼昨開市不久出現12億股每股0.1元嘅大手上板交易，未知係咪因此引起炒家興趣，不過如果喺0.15元高追，撻落0.12元收市都幾傷。
歐陽風