節錄自M記卧底戰隊──
黃隊員：「MosBurger？我哋新絕招呀？今次玩『星星』定『蕉蕉阿媽呢』呀？」
紅隊員：「碌葛！日本嚟嘅新敵人呀！同我哋一樣都係漢堡包專門店。」
黃隊員：「趁佢開全港首間分店仲未企穩陣腳，使唔使攞棵桔上去拜會吓佢呀？」
紅隊員：「邊個話佢未企穩呀？一嚟已經有17種新漢堡包登場，全部香港人都未食過，不如攞幾個試食偷吓師仲實際啦。」
記者：朱崇德
攝影：譚盈傑
行過都嗌好味！
「MosBurger」喺日本已經有35年歷史，穩佔全日本20%漢堡包市場佔有率，單以純種日本漢堡專門店計，絕對係一哥！而全港首間「MosBurger」今日喺apm美食廣場正式開業，原本以為無乜香港人識，不過喺2日前記者試食會上，我發現午餐時間好多街客盲舂舂撞入嚟嗌包食──「咦？終於喺香港開嗱？」「我喺日本食過，好正㗎。」「試吓咯……」跟住每隔5至10分鐘就出現人龍，要勞煩工作人員解釋今日只招待傳媒云云。據知「MosBurger」喺台灣同新加坡已經陀地咗12至13年，點解到𠵱家先喺香港開分店？香港社長山崎愛朗解釋：「Mos係間唔多做廣告，靠口碑口授相傳嘅漢堡包專門店，所以見台灣、新加坡市場成熟晒，先決定喺就香港開分店囉。」
包份量大10-20%
如果有趁過日本食「MosBurger」，一定會發覺香港分店定價幾平吓，一個包約$18至$30，加多$15變個Set，仲有埋汽水加薯條㖭。阿社長又話：「香港呢邊嘅定價比日本平10%，食物份量就大咗10至20%，真係幾抵吓！」質素呢？「日本嗰邊特登派師傅過嚟做廚房食品監控，保證品質同日本完全一樣。」唔怪得咁多街坊撐你話好味過M記喇，係咪擺明車馬同本地頭龍拗手瓜先，起初社長支吾以對，唔多想表態，俾記者夾得緊先話：「歡迎接受挑戰囉。」好，有志氣，我𠵱家就撐你，食個包先。
街坊試食裁判團
（地點：cookDeli@apm，時間：1:00pm）
編輯最鍾意做街訪，貪有Noise有Voice最反映到民意喎，我就好怕食檸檬，好多時為做三幾個街訪要我企街成粒鐘，慘。今次呢，街訪出奇地易做喎，問10個人有5個人回應兼肯上鏡，基本民意係感覺新奇，話好多口味未試過。
侯先生揀海鮮珍珠堡：「我喺加拿大返嚟，漢堡包食唔少，海鮮漢堡真係第一次食，M記同佢無得比。」
Kit揀照燒雞肉漢堡：「M記年年咁上下款，唔掂！呢個包好大，大到擺唔入口！」
Angel揀海鮮珍珠堡：「個飯Tastic包底就做軟咗啲，我都係覺得M記嘅好食啲又好味啲喎。」
Mandy揀照燒雞肉漢堡：「人人讚餡料，我就覺得包底有麵粉香，同餡料好Balance。」
Julie揀照燒雞肉漢堡：「個包甜甜哋，就連夾包嘅菜都新鮮啲，無得頂呀。」
照燒雞肉漢堡$20
呢款包喺新加坡「MosBurger」最好賣，3成客必叫，我做街訪都有半數人撐，難怪嘅，雞肉燒得勁香，抵撐嘅。
摩斯漢堡$20
日本最熱賣包種，大大片番茄加牛扒只係例行公事，特別在淋上一層滾熱辣茄汁肉醬，肉香Double入口Juicy。
金平牛蒡珍珠堡$18
邊個話漢堡包一定要夾扒？用勁高食物纖維嘅牛蒡配紫菜做夾餡，健康嘞啩？
海鮮珍珠堡$22
有別於一般炸魚海鮮漢堡，真係用帶子、蝦、魚等海鮮料炸成天婦羅做餡，入口甘脆香濃。
帶子天婦羅珍珠堡$25
天婦羅炸物做餡料，帶子鮮味好出，服！據知香港獨家，今日去朝聖嘅話，呢個漢堡必食。
烤牛肉珍珠堡$20
軟滑肥牛配飯Tastic包皮，現場行家笑稱：「好味到似『乜野家』嘅日式牛肉飯Portable版。」
醬味吉列豬扒漢堡$22
吉列豬扒係煎炸香口嘢，要大量生菜絲作伴，咁先食得均衡健康，大家識食喇。
搵食攻略
MosBurger（31481255）
地址：觀塘道418號創紀之城5期apmL18號舖
座位：400個
人均消費：$30-$40
交通：觀塘地鐵店A2出口
查詢：25766220